İsrail Müdafiə Nazirliyi yaxın mənzilli raketləri zərərsizləşdirmək məqsədilə lazer müdafiə sistemini təqdim edib.

Axar.az Teleqraf.com-a istinadla xəbər verir ki, uzun müddətdir üzərində iş apardığı bu sistemi İsrailin indiki mərhələdə, İran-ABŞ qarşıdurması dövründə təqdimatını keçirməsi təsadüfi sayılmayıb.

İsrail Müdafiə Nazirliyinin açıqlamasında qeyd edilir ki, “Dəmir Şüa” adı verilən yeni lazer müdafiə sistemi yaxın mənzilli raketlər, top mərmiləri, tank əleyhinə raket və kiçik ölçülü Pilotsuz Uçuş Aparatını (PUA) təsirsiz hala gətirə biləcək.

Dəmir Şüa sisteminin testlərinə gələn aydan başlanılacaq və onların 1,5 il sonra orduya veriləcəyi qeyd edilib.

Mobil formada daşına bilən lazer müdafiə sistemlərinin hava nəqliyyatına, habelə tanklara quraşdırmaq kimi üstünlüklərinin olduğu da ifadə olunur.

İsrail mediasının xəbərlərinə görə, indi mövcud olan Dəmir Qübbə hava müdafiə sistemi ilə atılan hər bir raketi təsirsiz hala gətirmək 49 min dollara başa gəldiyi halda, Dəmiş Şüa sistemində bu, cəmi 3,5 dollara başa gələcək.