Xaricdə işləmək, yüksək həyat standartları və yaxşı iş-həyat balansı bir çox insanın arzusudur. Bu arzu tamamilə gerçəkləşə bilər, çünki həm yeni məzunlar, həm də təcrübəli mütəxəssislər üçün iş imkanları asan olan ölkələr mövcuddur. Hər ölkənin özündə işçi çatışmazlığı olan sahələr fərqli ola bilər və bu da həmin ölkələrin xarici işçilərə qapılarını açmasına səbəb olur.

Valyuta.az iş tapmağın asan olduğu ölkələrin siyahısını təqdim edir:

Yeni Zelandiya

Yeni Zelandiya hər zaman ən yaxşı ölkələr siyahısında ön yerlərdədir. İş vizası almaq prosesi sadədir, yerli əhali qonaqpərvərdir, əhali az olduğundan iş imkanları çoxdur. Hazırda ən çox tələb olunan sahələr: tibb bacılığı, proqramlaşdırma, pərakəndə satış və mühəndislikdir.

Avstraliya

Yeni Zelandiya ilə oxşar iş mühitinə malikdir. İqtisadiyyatı sürətlə inkişaf edir, iş yerləri isə xüsusilə media, səhiyyə, qonaqpərvərlik və marketinq sahələrində çoxdur. İş günü adətən saat 17:00-dək bitir.

Kanada

Ən populyar miqrasiya istiqamətlərindən biridir. Aşağı əhali sıxlığına görə işçi qüvvəsinə daim ehtiyac var. İş vizası almaq nisbətən asandır. Mədəni müxtəliflik, azad mühit və iş imkanları ilə seçilir. Soyuq iqlim çətinlik yaratsa da, iş tapmaq nisbətən rahatdır.

Skandinaviya ölkələri (Danimarka, Norveç, İsveç)

Bu ölkələr təhlükəsiz və liberal iş mühiti təqdim edir. Təhsil və səhiyyə infrastrukturu güclüdür, sosial təminat yüksəkdir. İş imkanları əsasən ixtisaslı və peşəkar kadrlar üçün açıqdır.

Sinqapur

Asiyanın maliyyə mərkəzlərindən biridir. Əhalinin üçdə biri əcnəbilərdir. İş imkanları xüsusilə texnologiya, biznes və maliyyə sahələrindədir. Şəhər bahalı olsa da, maaşlar yüksəkdir.

Kamboca

İş icazəsi və vizası almaq prosesi dünyada ən sadələrdəndir. Uzunmüddətli biznes vizası asanlıqla uzadıla bilir. Sürətlə inkişaf edən ölkə olaraq əcnəbilər üçün iş imkanları açıqdır.

Tailand

Aşağı yaşayış xərcləri və təmiz mühiti ilə seçilir. İş imkanları xüsusilə proqram təminatı, rəqəmsal marketinq, biznes, tibb və turizm sahələrindədir.

Niderland

Yüksək həyat standartları, yaxşı ictimai nəqliyyat və güclü infrastrukturla tanınır. İş imkanları xüsusilə səhiyyə, vergi, idarəetmə, texnologiya, təhsil və İT sahələrindədir.