Pentaqon Qızıl Qübbə kosmik raketdən müdafiə sistemi planını tamamlayıb, lakin onun əhatə dairəsi və dəyərini açıqlamaqdan imtina edir. 32gun.az Bloomberg agentliyinə istinadən xəbər verir ki, Pentaqon Kosmik Qüvvələrin generalı Maykl Getlenin rəhbərlik etdiyi iddialı “Qızıl Qübbə” raketdən müdafiə planının tamamlandığını elan edib.

Yeni müdafiə formatı ABŞ-ın mövcud raketdən müdafiə sisteminə bir neçə yeni elementi inteqrasiya etməklə qarşı çıxa biləcəyi təhdidlərin sayını və mürəkkəbliyini genişləndirmək məqsədi daşıyır. Bununla belə, Pentaqon hələlik təhlükəsizliklə bağlı “Qızıl Qübbə” proqramının əhatə dairəsi və ya dəyəri ilə bağlı heç bir təfərrüat açıqlamayıb.

Məlum olan yeganə şey layihənin dəyərinin əhəmiyyətli olacağıdır: Prezident Donald Tramp daha əvvəl proqramın təxminən 175 milyard dollara başa gələcəyini bildirmişdi.

Bu arada Konqresin tərəfsiz Büdcə Ofisi hesab edir ki, təkcə kosmik ələ keçirmə şəbəkəsi növbəti 20 il ərzində ABŞ-a 542 milyard dollara başa gələ bilər.

Pentaqonun sözçüsü qeyd edib ki, proqram “çox bahalı, lakin kritik əhəmiyyətlidir”, çünki o, Birləşmiş Ştatlara mürəkkəb kosmik təhlükələrə qarşı durmağa imkan verəcək.

Tənqidçilər qeyd edirlər ki, layihənin həyata keçirilməsi böyük texniki problem olacaq, çünki əvvəllər heç vaxt kosmosda ələkeçirici raketlər yerləşdirilməyib. Təhlilçi Todd Qarrison vurğulayır ki, sistemin parametrlərindəki kiçik dəyişikliklər belə xərcləri yüz milyardlarla dollar artıra bilər.

Qızıl Qübbə proqramı qabaqcıl texnologiyanı böyük maliyyə riskləri ilə birləşdirərək, son illərdə ABŞ-ın ən iddialı və mübahisəli müdafiə layihələrindən birinə çevrilmək riski daşıyır.

Qızıl Qübbə düşmən raketlərinin Yer səthinə çatmazdan əvvəl erkən aşkarlanması və məhv edilməsi üçün kosmik əsaslı sistemin yaradılmasını nəzərdə tutan iddialı Amerika müdafiə proqramıdır.

Plan müşahidə üçün orbitə yüzlərlə peykin buraxılmasını, həmçinin hədəfləri tutmaq üçün lazer və ya raket silahları ilə silahlanmış döyüş peyklərini nəzərdə tutur. Reuters-in məlumatına görə, şəbəkəyə 400-dən 1000-dək müşahidə peyki və uçuş zamanı raketləri məhv etmək üçün nəzərdə tutulmuş təxminən 200 döyüş peyki daxil ola bilər.