Oğurlanmış pulların qaytarılması ilə bağlı danışıqlar aparılır
22-07-2020, 00:25
“Bloomberg” agentliyinin yaydığı məlumata görə, Malayziya hökuməti qarşıdakı həftə ərzində “Goldman Sachs” bankı ilə 1MDB dövlət investisiya fondundan oğurlanmış 6,5 milyard dollar vəsaitin ölkəyə geri qaytarılması barədə danışıqları yekunlaşdırmaq üzrədir.
“New Straits Times” qəzeti hökumətdəki mənbələrə istinadla bildirir ki, “Goldman Sachs” bankının menecerləri ötən istirahət günlərində paytaxt Kuala-Lumpura gəliblər. Məlumata görə, hökumət geri qaytarmaq istədiyi 6,5 milyard dollar vəsaitin hazırda 200 milyon dollarını ala bilib. Bununla yanaşı, fondun satılmış əmlakının müqabilində 150 milyon dollar ödənilib.
Məlumat üçün deyək ki, keçən ilin avqustunda Malayziyada “Goldman Sachs” bankının yüksək vəzifəli əməkdaşlarına qarşı 1MDB fondunun apardığı əməliyyatlarla əlaqədar məqsədli şəkildə qarışıqlıq yaratmaq ittihamı irəli sürülüb. Dünyanın 6 ölkəsində, o cümlədən, ABŞ-da fondun və “Goldman Sachs” bankının rəhbərliyinin hərəkətləri ilə bağlı məhkəmə dinləmələri başlanılıb. Noyabrda bank ABŞ Ədliyyə Nazirliyinə 1 milyard dollar məbləğində kompensasiyanın ödənilməsinə razılıq verib.
Xatırladaq ki, 1MDB fondu ilə bağlı qalmaqal 2015-ci ildə, 11 milyard dollar məbləğində mənimsəmə ilə əlaqədar məlumatların yayılmasından sonra başlanıb. Həmin vaxt KİV-lər bu vəsaitin Baş nazir vəzifəsini tutan Nəcib Razakın sərəncamında olduğunu yazırdılar. Aparılan istintaq zamanı cinayət tərkibinin olmadığı bəyan edilib. Lakin 2018-ci ilin mayında keçirilən seçkilərdə Mahathir Məhəmmədin rəhbərlik etdiyi müxalif qüvvələr qalib gəldikdən sonra sabiq Baş Nazirə qarşı korrupsiya, kirli pulların yuyulması, xüsusən böyük məbləğdə mənimsəmə və digər qanun pozuntuları ilə əlaqədar ittiham irəli sürülüb.
Mahmud QƏRİBOV, “Xalq qəzeti”