Fevralın 13-də Amerikanın Beverli -Hilz şəhərində “KGB” agentlərinin soyuq müharibə dövründə istifadə etdiyi dünyanın ən böyük xüsusi casus avadanlığı kolleksiyasını təqdim edəcək bir hərrac keçiriləcək.

KONKRET.az bu barədə Ukraynanın “Fokus” nəşrinə istinadən məlumat verir.

Məlumata görə, hərrac “Julien’s Auctions” evi və Nyu-York “KQB” Casus muzeyi tərəfindən təşkil olunur. 400-dən çox lot hərraca çıxarılacaq. Bunların arasında gizli kameralar, Morze kodu maşınları, gizli qeyd cihazları, dodaq boyası borucuğu şəklində tapança, ehtimal ki, Bolqarıstan dissidenti Georgi Markov öldürülməsi üçün istifadə edilmiş şpris-çətirinin bir nüsxəsi, telefon dinləmə cihazları, sənədlər və s. var.

Hərracda, həmçinin, 1960-cı illərin əvvəllərindəki Kuba raket böhranı ilə əlaqəli lotlar da nümayiş olunacaq. Belə ki, Çe Qevaranın məktəb hesabatı kartı, 1958-ci ildə Fidel Kastronun Havana sızmaq niyyətlərini göstərən məktubunu və s. almaq mümkün olacaq.