Çinin Xarici İşlər Nazirliyi Rusiyanın Ukraynanın şərqindəki separatçı siyasi strukturları tanıması ilə artan böhranın Tayvan məsələsi ilə heç bir oxşarlığının olmadığını bildirib.

Bunu nazirliyin sözçüsü Hua Çunyinq keçirdiyi mətbuat konfransında Tayvan rəsmilərinin müvafiq bəyanatları ilə bağlı sualı cavablandırarkən qeyd edib.

Hua bu tipli bəyanatları tarixi məlumatların olmaması ilə əlaqələndirib.

“Tayvan, əlbəttə ki, Ukrayna deyil. Tayvan həmişə Çinin ayrılmaz hissəsi olub. Bu, danılmaz tarixi və hüquqi faktdır. Vahid Çin prinsipi beynəlxalq münasibətlərdə hamı tərəfindən qəbul edilmiş normadır”, - deyə o, bəyan edib.

Hua vurğulayıb ki, Tayvan hakimiyyətinin Ukrayna məsələsindən öz mənfəətləri üçün istifadə etməyə çalışması ağılsızlıqdır.

Mənbə: TRT