Rusiya 1918-ci ildən bəri ilk dəfə suveren borcunu ödəməkdən imtina edib.

Manset.az xəbər verir ki, bu barədə “Bloomberg” məlumat yayıb.

Bildirilib ki, Rusiya bir əsrdə ilk dəfə olaraq xarici valyutada olan suveren borcunu defolt edib və bu, xarici kreditorlara ödəmə yollarını bağlayan Qərb sanksiyalarının kulminasiya nöqtəsi olub:

“Aylar ərzində ölkə Kremlin Ukraynaya müdaxiləsindən sonra tətbiq edilən sanksiyalardan yayınmaq üçün yollar tapdı. Lakin bazar günü günün sonunda, mayın 27-də ödənilməli olan təxminən 100 milyon ABŞ dolları məbləğində faiz ödənişləri üzrə güzəşt müddəti başa çatdı. Bu müddət keçdiyi təqdirdə defolt hadisəsi sayılır”.

Xatırladılıb ki, sonuncu dəfə Rusiya 1918-ci ildə xarici kreditorlar qarşısında defolt vəziyyətinə düşmüşdü, o zaman Vladimir Leninin başçılığı altında bolşeviklər ölkənin çarlıq dövründəki heyrətamiz borc yükünü ödəməkdən imtina etmişdilər.