Rusiyada yaşayan soydaşlarımızdan Moderator.az-a verilən məlumata görə aprelin əvvəlində Ermənistan-Azərbaycan münaqişəsinin yenidən aktiv fazaya qədəm qoymasından sonra ermənipərəst Rusiya təkcə KİV və telekanallarda deyil, digər "cəbhə"lərdə də anti-Azərbaycan təbliğatına start verib.

Belə ki, son günlər Rusiyanın iri şəhərlərindəki supermarketlərdə gözlənilmədən guya Dağlıq Qarabağda istehsal olunduğu iddia edilən çoxsaylı məhsullar peyda olub. "Artsax" adı ilə ərzaq məhsulları, spirtli içkilər piştaxtaların bəzəyinə çevrilib.

Soydaşlarımız bundan narahatlıqlarını ifadə edirlər və onlar tam əmindirlər ki, bu məhsullar nəinki işğal olunmuş ərazilərdə, heç Ermənistanda da istehsal olunmur və elə Rusiyanın öz məhsullarıdır, sadəcə Azərbaycanı qıcıqlandırmaq, aprel savaşındakı məğlubiyyəti həzm edə bilməyərək pərt durumda olan ermənilərin könlünü almaq üçün belə təxribatçı addımlara əl atılır.

Moderator.az Rusiyadakı diaspor liderlərinə və səfirliyimizə müraciət edərək məsələni diqqətdə saxlamağa və iddiaların nə dərəcədə həqiqəti əks etdirdiyini araşdırmağa səsləyir.