Rusiya ordusu Zaporojye və Xerson istiqamətlərində qüvvələrini artırır.
Bu barədə Ukrayna Silahlı qüvvələri Baş qərargahının Baş əməliyyat idarəsinin rəis müavini Aleksey Qromov keçirdiyi brifinqdə məlumat verib.

O, rusların üç taktiki batalyonu Novopavlovski istiqamətindən Krivoy Roq istiqamətinə keçirdiyini, həmçinin Zaporojye istiqamətində əlavə taktiki birliyi yerləşdirdiyini bildirib.

Aleksey Qromov Rusiyanın itirilmiş silah və hərbi texnikasını bərpa etdiyini, həmçinin dəmir yolu ilə -Kerç körpüsü və işğal olunmuş Krım ərazisi vasitəsilə Xerson və qismən Zaporojye istiqamətlərində qoşun qruplaşmasını artırdığını söyləyib.

“Krım Muxtar Respublikasının ərazisi Rusiya tərəfindən itkilərinin bərpa olunması, habelə silah, hərbi texnika, döyüş sursatı, maddi-texniki vasitələrin yığılması üçün plasdarm kimi istifadə olunur”,-deyə Ukrayna Baş qərargahının nümayəndəsi vəziyyətin çətinliyini bu sözlərlə ifadə edib.

Bundan başqa Rusiya Silahlı qüvvələrinin Şərq hərbi dairəsinə aid ordu aviasiyasının Krım yarımadasındakı hərbi aerodromlarına köçürülməsi qeydə alınıb.
Yenixeber.org