ABŞ, Çin, Almaniya, Yaponiya və Hindistan Ümumi Daxili Məhsula (ÜDM) görə dünyanın ən böyük iqtisadiyyatlarından hesab olunur. Ümumi daxili məhsul bir il ərzində ölkənin sərhədləri daxilində istehsal olunan hazır mal və xidmətlərin ümumi dəyərinin təxminidir. ÜDM, bir ölkənin iqtisadiyyatının ölçüsünü və qlobal iqtisadiyyata təsirini qiymətləndirmək üçün istifadə olunur.
Valyuta.az ən yaxşı iqtisadiyyata məxsus 10 ölkəni təqdim edir.

1. ABŞ - ABŞ iqtisadiyyatı nominal ÜDM-ə görə dünyanın ən böyüyüdür. Bu ÜDM-in ən böyük hissəsini xidmət sektoru təşkil edir. Məsələn, maliyyə, daşınmaz əmlak, sığorta, peşəkar və biznes xidmətləri, səhiyyə və s. ABŞ-ın iqtisadiyyatı nisbətən açıqdır, bu da çevik biznes investisiyalarına və xarici birbaşa investisiyalara şərait yaradır. O, dünyanın aparıcı geosiyasi gücüdür və dünyanın əsas ehtiyat valyutasının istehsalçısı kimi böyük xarici dövlət borcunu saxlaya bilir.

2. ÇİN - Çin nominal ÜDM-ə görə (cari ABŞ dolları ilə) dünyanın ikinci ən böyük, PPP-yə (Purchasing Power Parity – Alıcılıq Qüvvəsi Pariteti) görə isə ən böyük iqtisadiyyatına sahibdir. Son iyirmi ildə iqtisadiyyatında tarixi artım müşahidə olunub, bu da bəzi iqtisadçıların gələcəkdə Çinin ABŞ-ı geridə qoyaraq dünyanın ən böyük iqtisadiyyatı ola biləcəyi barədə ehtimallar irəli sürməsinə səbəb olub. Son 40 ildə Çin iqtisadiyyatını mərhələli şəkildə açdıqca, iqtisadi inkişaf və həyat səviyyəsi xeyli yaxşılaşıb. Hökumət kollektivləşdirilmiş kənd təsərrüfatı və sənayeni tədricən aradan qaldırıb, bazar qiymətlərində daha çox çeviklik tətbiq edib, bizneslərə daha çox müstəqillik verib, nəticədə isə daxili və xarici ticarət və investisiyalar sürətlə artıb.

3. ALMANİYA - Dünyanın üçüncü böyük iqtisadiyyatı Almaniyadır. Almaniya həm də Avropanın ən böyük iqtisadiyyatıdır. Almaniya avtomobillər, maşınlar, kimyəvi məhsullar və digər sənaye mallarının aparıcı ixracatçılarındandır və yüksək ixtisaslı işçi qüvvəsinə malikdir. Lakin Almaniya iqtisadi artımı üçün bəzi demoqrafik çətinliklərlə üzləşir. Onun aşağı doğum səviyyəsi yaşlanan işçi qüvvəsini əvəzləməyi çətinləşdirir, yüksək miqrasiya səviyyəsi isə sosial təminat sisteminə təzyiq göstərir.

4. YAPONİYA - Yaponiya dünyanın dördüncü ən böyük iqtisadiyyatıdır. Hökumət və sənaye arasında güclü əməkdaşlıq, eləcə də qabaqcıl texnoloji biliklər Yaponiyanın istehsal və ixracyönümlü iqtisadiyyatını formalaşdırıb. Bir çox böyük yapon şirkətləri keiretsu adlanan, qarşılıqlı əlaqəli şirkət şəbəkələri şəklində təşkil olunub. Lakin Yaponiya təbii sərvətlər baxımından kasıbdır və enerji idxalından asılıdır.

5. HİNDİSTAN - Hindistan dünyanın beşinci ən böyük iqtisadiyyatıdır. Böyük əhalisinə görə, bu siyahıda adambaşına düşən ÜDM ən aşağı olan ölkədir. Hindistanın iqtisadiyyatı ənənəvi kənd təsərrüfatı və əl işləri ilə yanaşı sürətlə inkişaf edən müasir sənaye və mexanikləşdirilmiş kənd təsərrüfatının qarışığından ibarətdir. Hindistan texnologiya xidmətləri və biznes autsorsinqinin əsas ixracatçılarından biridir, xidmət sektoru isə onun iqtisadi istehsalında böyük paya sahibdir.

6. BİRLƏŞMİŞ KRALLIQ - Birləşmiş Krallıq dünyanın altıncı ən böyük iqtisadiyyatıdır. Böyük xidmət sektoru, xüsusilə maliyyə, sığorta və biznes xidmətləri, Birləşmiş Krallığın iqtisadiyyatını hərəkətə gətirən əsas sahələrdir.

7. FRANSA - Fransa dünyanın yeddinci ən böyük ÜDM-ə malik ölkəsidir. Turizm mühüm sənaye sahəsidir və Fransa hər il ən çox turist qəbul edən ölkədir. Fransa qarışıq iqtisadiyyata sahibdir – müxtəlif sahələr üzrə çoxlu özəl və yarı-özəl bizneslər mövcuddur.

8. İTALİYA - Dünyanın səkkizinci ən böyük ÜDM-i İtaliyaya məxsusdur. O, həm də avrozonanın üçüncü ən böyük iqtisadiyyatıdır. İtaliyanın iqtisadiyyatı və inkişaf səviyyəsi regionlar üzrə xeyli fərqlənir: şimalda daha inkişaf etmiş, sənayeləşmiş iqtisadiyyat, cənubda isə az inkişaf etmiş bölgələr üstünlük təşkil edir.

9. KANADA - Kanada dünyanın doqquzuncu ən böyük iqtisadiyyatına sahibdir. Ölkənin yaxşı inkişaf etmiş enerji hasilatı sektoru var və o, sübut olunmuş neft ehtiyatlarına görə dünyada üçüncü yerdədir. Kanada, həmçinin əsasən ABŞ sərhədi yaxınlığındakı şəhər bölgələrində yerləşən güclü istehsal və xidmət sektorlarına malikdir. Kanadanın ABŞ-la azad ticarət əlaqələri nəticəsində, hər il Kanada ixracatının 77%-i ABŞ bazarına gedir. ABŞ-la sıx əlaqələri səbəbindən, Kanada böyük ölçüdə dünyanın ən böyük iqtisadiyyatı ilə paralel şəkildə inkişaf edib.

10. BRAZİLYA - Braziliya dünyanın onuncu ən böyük iqtisadiyyatına və Cənubi Amerikanın ən böyük iqtisadiyyatına malikdir. Braziliyanın müxtəlifləşdirilmiş iqtisadiyyatı ağır sənayelərdən, məsələn, təyyarə və avtomobil istehsalından mineral və enerji resurslarının hasilatına qədər geniş sahələri əhatə edir. Ölkədə həmçinin böyük kənd təsərrüfatı sektoru var və bu onu qəhvə və soya fasulyəsinin əsas ixracatçılarından birinə çevirir.