İsrail hakimiyyəti Qətərin vasitəçiliyi ilə Qəzza zolağında Fələstin radikalları tərəfindən saxlanılan girovlara dərman verilməsi barədə razılığa gəlib.

Bu barədə İsrailin Baş naziri Binyamin Netanyahunun Dəftərxanası məlumat yayıb.

“Baş nazir Binyamin Netanyahunun rəhbərliyi altında Mossadın rəhbəri David Barnea Qətərlə birlikdə Qəzzada HƏMAS terror təşkilatı tərəfindən saxlanılan girovlara dərman verilməsinə imkan verəcək addımlar atdı. Bu, İsrailin sektora humanitar yardımının bir hissəsidir”, – məlumatda deyilir.

Qeyd edilib ki, dərmanlar yaxın bir neçə gün ərzində anklava çatdırılmalıdır.

Xatırladaq ki, oktyabrın 7-də Qəzza zolağından HƏMAS yaraqlılarının İsrail ərazisinə soxulmasından sonra Yaxın Şərqdə vəziyyət kəskin şəkildə pisləşib və bu, sərhədyanı qəsəbələrin sakinlərinin öldürülməsi və uşaqlar, qadınlar və qocalar da daxil olmaqla 200-dən çox insanın girov götürülməsi ilə müşayiət olunub.

İsrail tərəfi buna cavab olaraq bu günə qədər davam edən “Dəmir qılınclar” əməliyyatının başlandığını elan edib.