Kanada Rusiya və Çin arasında artan yaxınlaşma fonunda Arktikadakı mövqelərini gücləndirmək məqsədilə yeni xarici siyasət strategiyasını həyata keçirəcək.
İqtisadiyyat.az xəbər verir ki, bu barədə ölkənin xarici işlər naziri Melani Coli bildirib.

"Kanada Arktik regionunun bir dövlətidir və indi kritik bir məqamdır. Arktika artıq aşağı gərginlik zonası deyil, buna görə də bu gün Arktikadakı yeni xarici siyasət strategiyamızı elan etməkdən məmnunam",- deyə diplomat vurğulayıb.

Nazir əlavə edib ki, Ukraynadakı münaqişə səbəbindən Rusiyanın Çindən artan asılılığı Moskvanın ənənəvi siyasətini dəyişir.

Coli bildirib ki, Rusiyanın Arktikadakı maraqları və resurslara olan iddiaları yaxşı məlumdur, lakin hazırda Moskva Çindən getdikcə daha çox asılı vəziyyətə düşərək, öz tarixi mövqeyini dəyişir və Arktikanı Çinə açır.

Yeni strategiyanın əsas məqsədləri arasında Kanadanın suverenliyini qorumaq, o cümlədən Şimal-Qərb keçidinə nəzarət etmək yer alır. Bundan əlavə, Kanada regionda hərbi mövcudluğunu gücləndirir ki, Arktikanı qorusun və ABŞ ilə birlikdə qitənin təhlükəsizliyini təmin etsin. Kanada həmçinin Arktik müttəfiqləri və NATO ilə əməkdaşlığı artırmağı planlaşdırır.