Pivə mədəniyyəti Çexiyanın Qeyri-Maddi Mədəni İrs siyahısına daxil edilib.
Çex Respublikası çex pivə mədəniyyətini ölkənin Qeyri-Maddi Mədəni İrs siyahısına daxil edib.
Xarici KİV xəbər verib ki, bunu Çexiya Mədəniyyət Nazirliyinin rəhbəri Martin Baksa deyib.
O qeyd edib ki, bu qərar ölkənin pivə mədəniyyətini UNESCO-nun Ümumdünya İrs Siyahısına daxil edilməsi üçün müraciətin verilməsinə yaxınlaşdırıb.
Hazırda Çexiyada 550-dən çox pivə zavodu var. Sənayenin bu sahəsində 65 minə yaxın işçi çalışır və 2023-cü ildə o, dövlət büdcəsinə 29 milyard kron (təxminən 1,2 milyard dollar) vergi gətirib.
"Biz fəxr edirik ki, pivə ilə bağlı mədəniyyət respublikamızın qeyri-maddi mədəni irsinin bir hissəsinə çevrilir" - Pivə Zavodları Assosiasiyasının icraçı direktoru Tomaş Sluneçko əlavə edib.
Daha əvvəl Tailandın mədəniyyət naziri Sudavan Vanqsuphakitkoson tay ədviyyatlı krevet şorbası Tom Yam Kunqun YUNESKO-nun Qeyri-Maddi Mədəni irs siyahısına daxil edildiyini açıqlamışdı.
Bundan əvvəl Avstriya paytaxtının hakimiyyət orqanları Vyana sosiska kiosklarının YUNESKO-nun Qeyri-Maddi Mədəni İrs siyahısına daxil edildiyi barədə məlumat vermişdilər.
Qeyd edək ki, Azərbaycandan UNESCO-nun Qeyri-Maddi Mədəni İrs siyahısına 24 nümunə daxildir. Bunlardan 22-i "Bəşəriyyətin Qeyri-Maddi Mədəni İrsinin Reprezentativ Siyahısı"na, 2 irs isə (Qarabağ atı ilə oynanılan "Çövkən" atüstü oyunu və Naxçıvanın ənənəvi qrup rəqsləri – yallı, köçəri, tənzərə) "Təcili Qorunmağa Ehtiyacı Olan Qeyri-Maddi Mədəni İrs Siyahısı"na daxil ediliblər.