ABŞ Konqresinin Nümayəndələr Palatasının demokrat üzvü El Qrin Donald Trampa qarşı impiçmentin müzakirəsini təklif edəcək.

“Report” xəbər verir ki, siyasətçi bu barədə qanunvericilik orqanının rəsmi saytında yayımlanan iclas zamanı bəyan edib.

"Prezident Trampa qarşı impiçment elan etmək üçün iş artıq başlayıb. Mən onun təklifləri və əməllərinə görə ona qarşı impiçment layihəsini təqdim edəcəyəm", - konqresmen bildirib.

Qrinin fikrincə, Tramp Qəzza sektoru ilə bağlı son bəyanatlarına görə hakimiyyətdən kənarlaşdırılmağa layiqdir.

Qeyd edək ki, Donald Tramp İsrailin Baş naziri Binyamin Netanyahu ilə danışıqlar zamanı Qəzza sektorunun sakinlərinin Misir və İordaniyaya köçürülməsini təklif edib.

Bundan əlavə, o söyləyib ki, ABŞ Qəzza sektorunu nəzarətə götürməyə, onu partlamamış sursatlardan təmizləməyə və dağılmış binaları sökməyə hazırdır.