Tailandlı qadın buddist rahibləri intim videolarla şantaj edərək 12 milyon dollar qazanıb. Lakin bütün pullarını onlayn kazinoda itirib.

"Associated Press" xəbər verir ki, 35 yaşlı Vilavan Emsavat ən azı doqquz buddist rahibini yoldan çıxarıb. O, romantik münasibətləri üzə çıxarmamaq üçün rahibləri şantaj edərək külli miqdarda pul tələb edib.

Məsələ burasındadır ki, Tailand rahibləri əsasən Teravada təriqətinə mənsubdurlar ki, bu da onlardan subay qalmağı və hətta qadına toxunmaqdan çəkinməyi tələb edir.

Tailand polisi Vilavanı evində saxlayıb. Qadın şantaj yolu ilə pul tələb etməkdə və çirkli pulların yuyulmasında ittiham olunub. Polis qadının hesabına ümumilikdə 11.9 milyon dolların köçürüldüyünü, lakin bu məbləğin böyük hissəsinin onlayn kazinoda itirildiyini bildirib.

Vilavan özü yalnız bir rahiblə romantik münasibətdə olduğunu etiraf edib.