Şimali Koreya lideri Kim Çen In bu həftə Çin və Rusiya ilə münasibətləri gücləndirmək məqsədilə Pekinə səfər edib.

Səfərin ən mühüm məqamlarından biri isə onun 12 yaşlı qızı Kim Cu-aeni ilk dəfə beynəlxalq ictimaiyyətə təqdim etməsi olub.

Kim Cu-ae atası ilə birlikdə Pekində keçirilən hərbi paradda iştirak edib. Bu, onun ilk xarici səfəri kimi tarixə düşüb. Şimali Koreyanın rəsmi mediası tərəfindən yayımlanan fotolarda Cu-ae atasının yanında yer alıb. 2022-ci ildən bəri hərbi paraddan silah sınaqlarına və mühüm siyasi tədbirlərə qədər daim atasının yanında görünməsi onun xüsusi mövqeyə sahib olduğunu göstərir.

Cənubi Koreyalı ekspertlər Kim Cu-aenin vəliəhd kimi yetişdirildiyini düşünürlər. Kim Çen In-un altı ildən sonra ilk Çin səfərinə qızını da aparması bu statusun daha da möhkəmləndiyinə işarə edir. Seulda yerləşən Koreya Araşdırmaları Universitetinin sabiq rəhbəri Yanq Mu-cin bu hadisəni “Çin rəhbərliyinə özünü tanıtma mərasimi” adlandırıb.

Seconq İnstitutundan Çonq Sonq-çanq isə bildirib: “Pekindəki mənzərə Cu-aenin yalnız ölkə daxilində deyil, xaricdə də Şimali Koreyanın ikinci adamı kimi qəbul edildiyini göstərir. Kim Çen In qızını Çinə aparmaqla onun vəliəhdi olacağı mesajını açıq şəkildə verdi".

"AzPolitika.info"