Çinin neft-qaz şirkəti “PetroChina” dünyanın ən nəhəng neft yataqlarından birini aşkar edib.

OilGas.az xarici mediaya istinadən xəbər verir ki, yataq Çinin Sintszyan-Uyğur muxtar rayonunda tapılıb. Yatağın geoloji ehtiyatları 1,24 mlrd ton olaraq qiymətləndirilir. Bu həcmin 520 milyon tonu təsdiq edilmiş ehtiyatdır. Kəşf edilmiş ehtiyatlar artıq ABŞ-da (Alyaska ştatında) Hemlok yatağı və Braziliyanın Kampus neft-qaz hövzəsindən daha nəhəngdir.

Yeni yataq Ma gölü ətrafında tapılıb. Burada 1990-cı illərdən kəşfiyyat işləri aparılır. İndi belə nəhəng yatağın kəşfi nəzərə alınaraq kəşfiyyat işlərinin tempi sürətləndirilə bilər.

Geoloqlar hesab edirlər ki, ərazidə ehtiyatı 1 milyard tondan artıq daha bir yataq tapıla bilər.

Qeyd edək ki, Çində Datsinsk neft-qaz yatağı ehtiyatlarına görə ən böyük mənbədir. 1959-cu ildə kəşf edilən bu yatağın ehtiyatları 5,7 milyard ton təşkil edir.