Teref.az olaraq azeuronews.com saytına istinadən Saatlı rayon icra hakimiyyətinin başçısı Nazim İsmayılovun oğlu Anar İsmayılovun Kanadada şirkəti və mülkünün aşkarlanması ilə bağlı yazı dərc etmişdik.Bu məlumatdan başqa Teref.az olaraq Anar İsmayılovun apardığı həyat tərzi ilə bağlı mətbuatda gedən və təkzib olunmayan bəzi faktları və fotolarıda dərc etmişdik.
Teref.az olaraq Saatlı İcra başçısı Nazim İsmayılovdan təkzib xarakterli məktub almışıq. Nazim İsmayılov yazır:
“03 sentyabr 2019-cu il tarixdə müxtəlif saytlarda “azeuronews.com”- a istinadən “guya mənim, yəni Saatlı rayon İcra Hakimiyyətinin başçısı Nazim İsmayılovun oğlu Anar İsmayılovun Kanadanın paytaxtı Torontonun “North York” bölgəsində dəyəri 1 milyon 300 min dollar (2 milyon 210 min manat) olan mülk aldığı və həmin əmlakın alınmasına dair çıxarışın surəti” barədə material dərc olunmuşdur.Nə mənim, nə də oğlumun Kanadada mülkü var. Oğlum Anar İsmayılovun olduğu iddia edilən Kanadanın paytaxtı Torontonun “North York” bölgəsində dəyəri 1 milyon 300 min dollar (2 milyon 210 min manat) olan mülkün alınmasına dair çıxarışın surəti isə saxtadır”.

Bunu Teref.az-a açıqlamasında Saatlının icra başçısı Nazim İsmayılov söyləyib. Onun sözlərinə görə, oğlunun Kanadada mülk alıb, şirkət açması ilə bağlı məlumatlar yalan və böhtandır.

“Mən bunları rədd edir, dərc olunan sənədin saxta olduğunu bildirir və bəzi KİV-lərin reytinq naminə dəqiqləşmə aparmadan yalan məlumat yaymalarından dərin təəssüf hissi keçirirəm”- deyə icra başçısı bildirib.

Xatırladaq ki, Saatlı rayon icra hakimiyyətinin başçısı Nazim İsmayılovun oğlu Anar İsmayılovun Kanadada şirkəti və mülkünün aşkarlanması ilə bağlı xəbərlər yayılıb.

İcra başçısının oğlunun Kanadadakı mülkünün 1 milyon 300 min dollar olduğu göstərilir. Mülkün icra başçısının oğluna aid olduğu ilə bağlı bəzi sənədlər sosial şəbəkələrdə yayılıb.
Teref.az