Xalq Cəbhəsinin öncülləri Vidadi İsgəndərli adlı şəxsin bu proseslərdə iştirak etmədiyini dedilər, ona xitabən “əxlaqdan kənar mübarizə metodları qəbuledilməzdir” söylədilər

Rusiyada martın 18-də prezident seçkisi keçiriləcək. Seçki yaxınlaşdıqca ABŞ-dan Rusiyaya, xüsusilə də Vladimir Putin iqtidarına basqı artır. Artıq ABŞ Rusiyaya qarşı bundan sonrakı sanksiyalar üçün dörd sfera müəyyən edib. Bu halda, Rusiya prezidenti Putin üçün ən təhlükəli zərbə rus oliqarxlarına qarşı məhdudlaşdırıcı tədbirlər ola bilər.

Xəbər verildiyi kimi, YAP icra katibinin müavini, Milli Məclisin İctimai birliklər və dini qurumlar komitəsinin sədri Siyavuş Novruzov Milli Azadlıq Hərəkatında iştirak edənlərə adbaad səslənərək, özünü illərin hərəkatçısı kimi təqdim edən, son vaxtlar qalmaqallı videolar yayan və təhqiramiz tonda danışan Vidadi İsgəndərlinin Milli Azadlıq Hərəkatında olub-olmadığına aydınlıq gətirmələrini xahiş edib. Sitat: “Mən Milli Azadlıq Hərəkatında, Meydan Hərəkatında iştirak edənlərə müraciət edirəm, desinlər görək, bu adamı o proseslərdə görüblər? Azərbaycanın müstəqilliyi, ya Qarabağ uğrunda mübarizədə onun iştirak etdiyini görən olubmu? Mən müraciət edirəm, Əbülfəz Elçibəyin ailə üzvlərinə! Allah onun özünə qəni-qəni rəhmət eləsin! Ailə üzvləri desin, bir dəfə bizim onlar haqqında təhqiramiz ifadə işlətdiyimizi eşidiblər?”

S.Novruzovun adını çəkdiyi şəxslərin bəziləri məsələyə münasibət bildiriblər.


Milli Azadlıq Hərəkatının liderlərindən biri, Vətəndaş Həmrəyliyi Partiyasının sədri Sabir Rüstəmxanlı bidirib ki, Adətən Milli Azadlıq Hərəkatında iştirak edən və üzdə olan insanlar hamısı bir-birini tanıyır. Vidadi İsgəndərli o hərəkatda olsaydı, ən azından, adını eşitmiş olardım: “Mən hərəkatda Vidadi İsgəndərli adlı şəxsi tanımırdım. Milli Azadlıq Hərəkatında yüz minlərlə insan iştirak edib. Əlbəttə, hamısını tanımaya bilərəm. Ancaq o hərəkatda iştirak edən Vidadi İsgəndərli adlı adam tanımamışam. Kim olduğunu da bilmirəm. Bu adda insanın Milli Azadlıq Hərəkatına qoşulduğunu eşitməmişəm”.

Modern.az saytı S.Novruzovun çağırışına mərhum eks-prezident Əbülfəz Elçibəyin ailəsindən münasibət öyrənməyə çalışıb. Elçibəyin xanımı Türkiyədə olduğundan oğlu Ərturqut Əliyev məsələyə dair mövqeyini açıqlayıb: “Azərbaycan hakimiyyəti tərəfindən bizim ailəmiz, ailə üzvlərimiz təhqir olunmayıb. Kimsə kiminsə fikirlərinə etiraz edə bilər. Lazım gəlsə, kimisə tənqid də etmək olar. Amma təhqir yolverilməzdir. Mənim ailəmə qarşı təhqir olmayıb və ola da bilməz”.

Xalq hərəkatının liderlərindən olan ADP sədri Sərdar Cəlaloğlu da xalq hərəkatında V.İsgəndərlinin tanımadığını deyib.


Xalq hərəkatının öncüllərindən olan, deputat Fəzail Ağamalı isə S.Novruzovun müraciəti ilə bağlı ayrıca böyük bəyanat yayıb. Bəyanatda F.Ağamalı V.İsgəndərli adlı hərəkatçı tanımadığını bildirib: “Xalqımız azadlıq uğrunda mübarizəyə başlayandan bu günə qədər onun tam içərisində olanlardanam. Vidadi İsgəndərlini bu mübarizınin nə ortasında, nə də önündə görmüşəm. Ara-sıra müxalifətin keçirdiyi mitinqlərdə İsa Qəmbərin, Əli Kərimlinin yanında duraraq ekranın obyektinə tuş gəlməyə çalışan Vidadi İsgəndərli bir gün xaricə getmək və daha yaxşı yaşamaq üçün ”siyasi mühacir" adını qazanmağa çalışanlardan və buna nail olanlardandır. Vəssalam".


Milli Şuranın sədri Cəmil Həsənli isə bildirib ki, kiminsə ailə üzvünün təhqir edilməsi yolverilməzdir: “İstər mətbuatda, istər siyasi qarşıdurmalarda insanların şəxsiyyətini alçaldan, ailə həyatına müdaxilə edən hər hansı ifadələr yolverilməzdir. Bunu etmək olmaz. Siyavuş Novruzovun narahatlığını başa düşürəm. Ancaq bu narahatçılığı gərək, müxalif düşərgənin adamları təhqir olunanda da keçirərdi”.

“Vidadi İsgəndərli Meydan hərəkatında iştirak edibmi” sualına isə Milli Şura sədri belə cavab verib: “Söhbət Vidadi İsgəndərlinin o hərəkatda iştirak edib-etməməsindən getmir. Vidadi heç iştirak etməyib, amma Vidadiyə görə onun atasının məzarını o formada təhqir etmək olmaz. Əgər bir şəxs düzgün olmayan iş görübsə, onun özüylə haqq-hesab çəkmək lazımdır”.


Xalq Hərəkatının iştirakçısı, politoloq Zərdüşt Əlizadə axar.az-a deyib ki, 7-8 il bundan əvvələ qədər ümumiyyətlə Vidadi İsgəndərli adlı adam tanımayıb: “Vidadi İsgəndərli haqqında son 7-8 il ərzində eşitmişəm. Yəni hüquq müdafiəçisi kimi həbs edildiyi zamanlarda tanımağa başladım. Ondan əvvəl isə ümumiyyətlə onun kim olduğunu bilmirdim. Milli Azadlıq Hərəkatında isə qəti bilirəm ki, Vidadi İsgəndərli adlı adam olmayıb. Bütün bölgələrdən, şəhərdən, minlərlə insan tanıyıram ki, Xalq Hərəkatında iştirak edib. Şəxsən tanıdıqlarım da var, tanımayıb, adını eşitdiklərim də var. Mən Vidadi İsgəndərli adlı insan tanımamışam. Xalq Hərəkatında iştirak etsəydi, hətta şəxsi tanışlığımız olmasaydı belə, adından tanıya bilərdim. Bəlkə kimlərsə tanıyır, mən səhv edirəm?! Mən öz adımdan deyirəm ki, belə bir insan tanımamşam”.


Milli Məclisin deputatı, Xalq Hərəkatının fəallarından olan Fazil Mustafa isə siyasi mübarizə zamanı kimliyindən asılı olmayaraq, qırmızı xətti gözləməyin lazım olduğunu deyib: “Biz 35 ildən artıqdır ki, siyasi mübarizənin içərisindəyik və bu mühitdə xeyli sayda tanımadığımız insan var. Vidadi İsgəndərlinin özünü tanımamışam, amma qardaşı İsfəndiyarı tanıyıram. İsfəndiyar bəy dəyərli, hörmət etdiyim şəxslərdən biridir. Vidadi İsgəndərlini isə bir neçə il öncə həbsdən çıxandan sonra tanımışam. Əvvəllər hakimiyyətə qarşı ən sərt, barışmaz mövqedə dayanmışıq, amma tam səmimi deyim ki, indiyə qədər mənə qarşı da hansısa haqsızlıqlar olub. Həbsə də düşmüşəm, lakin bütün bunlara baxmayaraq, həmişə fikir vermişəm ki, hansısa şəkildə istər Heydər Əliyevin, istərsə də İlham Əliyevin hakimiyyəti dövründə şəxsi və yaxud ailə zəminində təhqirlə qarşılaşmamışam. İnsanlar başa düşməlidirlər ki, siyasi mübarizə insanın özü ilə aparılır. Onun ailəsini, uşaqlarını təhqir etmək, söyüşdən istifadə etmək düzgün deyil. Bu, həm hakimiyyət, həm də müxalifət nümayəndələrinə aiddir”.


Xalq hərəkatının tanınmış simalarından olan Vəhdət Partiyasının sədri, deputat Tahir Kərimli də Vidadi İsgəndərlini ancaq son günlər etdiyi radikal çıxışlarına görə tanıdığını bildirib: “Əvvəla, Siyavuş müəllimə təşəkkür edirəm, mənim məhkəmə sədri olduğum halda Milli Azadlıq Hərəkatına qoşulduğumu bildirdiyi üçün. Milli Azadlıq Hərəkatı olan zaman ola bilər ki, Vidadi İsgəndərli orada iştirak edib. Ancaq mən onu görməmişəm, tanımamışam. Onu son dövrlərdə radikal çıxışlarına görə tanımışam. Xalq Hərəkatında iştirak etməsi barədə də heç kəsdən eşitməmişəm. Hazırda yanımda olan partiya yoldaşlarımdan da soruşdum. Onlar da mənimlə eyni fikirdədir, yəni nə Vidadi İsgəndərlini tanıyan var, nə də xatırlayan.

Nə olursa olsun, istənilən halda əxlaqdan kənar mübarizə metodları qəbuledilməzdir".

Xalq hərəkatının öncüllərindən olan, deputat Fərəc Quliyev də V.İsgəndərlini tanımadığını bildirib: “Bütövlükdə istər müxalifət, istərsə də hakimiyyətdə olanlar tərəfindən sərgilənən təhqir xarakterli davranışın əleyhinəyəm. Mən Vidadi İsgəndərlini tanımıram və müstəqillik uğrunda vüsət almış Azadlıq Hərəkatında belə bir adamla hər hansı birgə fəaliyyətimiz olmayıb, lakin bütün hallarda hər hansı bir xidmətinin olub-olmamasından asılı olmayaraq, kiminsə kimisə təhqir etməsi birmənalı şəkildə yolverilməzdir və qınanılmalıdır. Siyasətçilər isə millətin və dövlətin taleyini çiyinlərinə almağa iddialı olan şəxslər kimi, daha da nümunəvi dəyərlərə köklənməlidirlər. Qeyri-etik davranışlar və danışıqlar kimliyindən asılı olmayaraq hüquqi aspektdə və bizim mental dəyərlərəmizlə qəbuledilməzdir”.