Azərbaycan bankları növbəti devalvasiyaya hazırlaşır. Artıq banklar manatla kredit verilməsini dayandırıb, yalnız dollarla kredit verilir. Bu barədə istiqlal.az-a bank sekorundakı mənbələrdən məlumat daxil olub.

Mənbənin məlumatına görə, banklar manatla kredit almaq istəyənlərə müxtəlif bəhanələrlə rədd cavabı verir. Məsələn, “Bakı qeydiyyatında deyilsən”, “dövlət qulluğunda işləyən 3 nəfər zəmanət verməlidir” və s. bəhanələrlə müştərilərə qapını arxa tərəfdən örtməyi tapşırırlar. Hətta bankdan əvvəllər kredit götürən və vaxtı-vaxtında ödəyən şəxslərə də oxşar bəhanələrlə rədd cavabı verirlər. Halbuki bu şəxslər pozitiv müştərilər kateqoriyasına daxildir və bank praktikasına görə, onlar qeyd-şərtsiz kredit verilməlidir. Hətta yüksək maaşı olanlara belə “rədd” cavabı verilir.

Mənbə deyir ki, bu təlimat Mərkəzi Bankdan gəlməyib: “Bu bankların özünü sığortalamaq üçün atdığı addımdır. Bank sektorunda çox yaxın günlərdə devalvasiyanın baş verəcəyi ilə bağlı məlumatlar var. Ona görə də kreditlərin verilməsi devalvasiyaya qədər təxirə salınıb”.