Prokurorun Şirin Cəfəriyə 5 il həbs istəməsi prezidentə qarşı növbəti təxribatdır; dövlətin yanında olan tənqidi medianı susdurmaq kimlərə yarayır?

Müstəqil mətbuatın qalalarından olan “Gündəm-xəbər” qəzetini həbs etmək istəyirlər. Artıq daha bir tənqidi medianın ağzını yummaq, qollarını qandallamaq üçün çırmanıblar.

Prezidentin mətbuata verdiyi dəstəyin fonunda bəzi məmurların hələ də bu siyasətə qarşı çıxması, 4-cü hakimiyyət nümayəndələrini zindana saldırmaq niyyəti qüvvəsində qalır. Prokurorun qəzetimizin baş redaktoru Şirin Cəfəriyə 5 il həbs cəzası istəməsi buna nümunədir.

Media-hakimiyyət münasibətlərinin inkişaf etdirildiyi bir vaxtda bəzi məmurların qəzetlərin üstünə getməsi sadəcə, prezident İlham Əliyevin fəaliyyətinə maneçilikdir. Prokuror isə bir qəzeti bağlatmaq, baş redaktorunu həbs etdirmək üçün əlindən gələni əsirgəməyib.

Prezident İlham Əliyev jurnalistlərin dostu elan olunanda bəzi məmurlar mətbuata qarşı düşmənçiliyini davam etdirdilər. Ölkə başçısının mediaya maddi və mənəvi dəstəyi olduğu zamanlarda, KİV nümayəndələrinin mənzillə təmin olunduğu vaxtlarda yenə də ayrı-ayrı vəzifəlilər öz ayıblarına kor olmaq əvəzinə qələm əhlinə hücum xəttini seçdilər.

“Gündəm-xəbər” qəzeti və təsisçisi Şirin Cəfəri də iki ildir məhkəmə çəkişmələrindədir. Bəzi dövlət məmurları öz təzyiq rıçaqlarından istifadə edərək bir media orqanını çökdürmək, baş redaktorunu həbsə göndərmək üçün çırmanıblar.

“Gündəm-xəbər” qəzeti çap mediasında öz müstəqilliyini qoruyub saxlayan qəzetlərdən biridir və bu günə kimi azad söz uğrunda mübarizədə ön cərgələrdə yer alıb.

Korrupsioner məmurların ifşası, onların vətəndaşlara qarşı etdiyi qanunsuzluqlar, dövlətin vəsaitlərini şəxsi maraqları naminə xərcləməsi faktları hər zaman bu qəzetin səhifələrində çap edilib.

Bunun nəticəsidir ki, “Gündəm-xəbər” qəzeti indiyə qədər məmurlar tərəfindən təzyiqlərə məruz qalır, prezidentin mediaya dəstək verdiyi halda vəzifəlilərin basqıları ilə qarşı-qarşıya qalır.

Baş redaktor Şirin Cəfərinin prezident İlham Əliyevə müraciətində bu faktları sadalaması geniş şəkildə öz əksini tapıb. Belə ki, “Gündəm Xəbər” qəzeti işıq üzü gördüyü illər ərzində dövlətçiliyə xidmət edən bir mətbu orqan olub.

Yəqin ki, Şirin Cəfərinin həbsi, müstəqil mətbuata təzyiq kimi də qiymətləndiriləcək və dövlət ittihamçısının ədalətsiz ittihamı irəli sürməsi isə, onun ictimai qınaqla üz-üzə qalmasına da səbəb olacaq.

“Gündəm xəbər” qəzetinin təsisçisi Şirin Cəfəri, həbsinə saylı günlər qaldığını bildirir. Baş redaktorun mətbuata verdiyi açıqlamalara görə, artıq proses özünün arzuolunmaz sonluğuna yaxınlaşmaqdadır.

O, bildirir ki, “03.02.2016-cı il tarixdə saat 09:40-a təyin olunmuş məhkəmə prosesində şahid qismində dindirilən Yasamal rayon Məhkəməsi icra şöbəsinin rəisi Zaur müəllim ifadə verdikdən sonra, prokuror son çıxışını etdi və barəmdə 5 il azadlıqdan məhrumetmə cəzasının seçilməsini bildirdi.

Hər kəsə bəllidir ki, həbsimə heç bir əsas yoxdur. Çünki, Vergilər Nazirliyinin barəmdə çıxardığı 71 428 manat 16 qəpik cərimə qərarı, olduqca qərəzli və heç bir əsasa söykənməyən qərardır.

Bunu onunla izah edirəm ki, hələ bir neçə il bundan əvvəl “Gündəm Xəbər” qəzetinin təsisçisi olaraq mənə qarşı, heç bir əsası olmayan, həqiqəti özündə ifadə etməyən, yəni guya vergidən yayınmağımla bağlı Azərbaycan Respublikası CM-nin 213.2-ci maddəsi ilə cinayət işi qaldırıldı və Gəncə şəhər Kəpəz rayon Məhkəməsində məhkəmə prosesinə də başlanıldı.

20 may 2013-cü il tarixdə keçirilən məhkəmə prosesində, barəmdə üç il şərti, iki il isə sınaq müddətinə məhkəmə hökmü elan olundu. Çıxarılmış qərarla razılaşmayıb, Gəncə Apelliyasiya Məhkəməsinə apelliyasiya şikayəti etsəm də, Apelliyasiya Məhkəməsi Kəpəz rayon Məhkəməsinin çıxartdığı qərarı qüvvədə saxladı.

Bununla da razılaşmayıb, çıxarılmış qərardan Ali Məhkəməyə müraciət etməli oldum. 02 sentyabr 2015-ci il tarixdə isə, birinci instansiya məkhəməsinin çıxartdığı qərar, Ali Məhkəmə tərəfindən də qüvvədə saxlandı.

Belə bir qərarların çıxarılması onu söyləməyə əsaslar verir ki, tənqidə dözümsüzlük nümayiş etdirən məmurlar tərəfindən verilmiş sifarişlər, məhkəmələrin mənimlə bağlı ədalətsiz qərarlar qəbul etmələri ilə nəticələndi.

20 may 2015-ci il tarixdə barəmdə çıxarılmış iki il şərti cəza müddəti başa çatdıqdan sonra, 23 oktyabr 2015-ci il tarixdə Ədliyyə Nazirliyinin İstintaq

İdarəsində, təkrar Azərbaycan Respublikasının CPM-nin 306.1-ci maddəsi ilə təqsirləndirilməyimə dair 152950067 nömrəli cinayət işinə başlanıldı və ittiham aktının araşdırılması üçün toplanmış iş materialları, CM-nin 306.2-ci maddəsi ilə təqribən iki ay bundan əvvəl Yasamal rayon Məhkəməsinin hakimi Hüseyn Səfərovun icraatına göndərildi.

Onu da bildirim ki, vəkilim Zaur Niftəliyev, müdafiəmlə bağlı son çıxış etmək üçün hakimdən vaxt istədi. Hakim növbəti prosesin 16 fevral 2016-cı il tarixdə saat 11:00-da keçiriləcəyi və son çıxışların da olacağı elan etdi".

Şirin Cəfərinin Vergilər Nazirliyi tərəfindən fantastik rəqəmlə, yəni 71.478 manat 16 qəpik məbləğində cərimə olunması, əslində müstəqil mətbuata qarşı təzyiq kimi qiymətləndirilməli və olduqca da pislənməlidir. Axı, əldə olan vergi hesabatları çıxarılmış qərarın sifarişli, həqiqəti əks etdirməyən qərar olduğunu tam isbat etməyə tam əsaslar verir.

GundemXeber.az