Ötən axşam Bakının Nəsimi rayonunda bıçaqlanma hadisəsi baş verib. ANS PRESS-in məlumatına görə, rayonun Asif Məhərrəmov küçəsi 68 ünvanında yaşayan 27 yaşlı Nəbibəyli Fuad Vüqar oğlu bıçaqlanıb. Naməlum şəxs Fuad Nəbibəyliyə bıçaq xəsarətini yaşadığı binanın həyətindəki avtomobil dayanacağında yetirib.

Yaralı özü taksiyə əyləşərək xəstəxanaya gedib. O, dərhal əməliyyat olunub. Həkimlər 27 yaşlı Fuadda bir bıçaq xəsarətinin olduğunu bildiriblər. Hadisə barədə Nəsimi RPİ-nin 19-cu polis bölməsinə məlumat verilib.

Zərgərliklə məşğul olan Fuad Nəbibəyli polisə onu bıçaqlayan şəxsi tanımadığını deyib. Lakin Nəsimi rayon polis idarəsinin 19-cu polis bölməsinin əməkdaşları keçirilən əməliyyat nəticəsində hadisənin törədənin kimliyini müəyyən edib.

Həmin şəxsin tutularaq istintaqa təhvil verilməsi istiqamətində əməliyyat axtarış tədbirləri həyata keçirilir. Faktla əlaqədar cinayət işi də başlanıb.