Aprelin 6-da Goranboyun Tapqaraqoyunlu kəndinin atəşə tutulması nəticəsində xidməti vəzifəsini yerinə yetirən polis baş serjantı Ramiq Zeynalov da baş nahiyəsindən ağır yaralanıb və təcili olaraq Daxili İşlər Nazirliyinin (DİN) general-leytenant Arif Heydərov adına Respublika Hospitalına gətirilib.

Bu barədə Axar.az-a DİN-in mətbuat xidmətindən məlumat verilib.

İntensiv terapiya şöbəsinə yerləşdirilən yaralıya həkimlər tərəfindən cərrahi müdaxilə edilib, bütün digər lazımı tədbirlər görülüb. Hazırda onun vəziyyəti orta ağırdır.

Aprelin 7-də R.Zeynalova baş çəkən respublika daxili işlər nazirinin müavini, polis general-leytenantı İsmət Əliyev onun səhhəti ilə maraqlanıb, tibb personalına müvafiq göstərişlərini verib.

Nazir müavini təmas xəttində yerləşən kəndlərin, evlərin, mülki şəxslərin atəşə tutulmasının Ermənistanın təcavüzkar siyasətinin bariz nümunəsi olduğunu və düşmən tərəfin beynəlxalq hüququn tələblərini kobud şəkildə pozduğunu vurğulayıb. Qeyd olunub ki, əks hücumlar zamanı silahlı qüvvələrimizin qarşısında tab gətirməyən Ermənistan ordusunun dinc sakinləri atəşə tutaraq əhali arasında təşviş yaratmağa cəhd etməsi, “atəşkəs” elan olunmasına baxmayaraq, cəbhə boyu ərazilərdə davamlı təxribatlar törətməsi bunu deməyə əsas verir ki, işğalçılar mənfur niyyətlərindən əl çəkmək istəmirlər.

Bu gün Azərbaycan xalqının ölkə Prezidenti, Ali Baş Komandan cənab İlham Əliyevə, Qafqazın ən güclü ordusu kimi özünü təsdiq edən, dünya standartlarına cavab verən maddi-texnki təminatla tam təchiz edilən ordumuzun yaxın zamanda torpaqlarımızı azad edəcəyinə, dağılmış infrastrukturun bərpasına, qaçqın və məcburi köçkünlərin tezliklə öz yurd-yuvalarına qayıdacağına, azad olunmuş bölgələrdə Azərbaycan Polisinin asayişin keşiyində daha mətin dayanacağına inamını ifadə edən nazir müavini şəhidlərimizə rəhmət, düşmən gülləsinə tuş gələn yaralılara şəfa diləyib.