ABŞ-nin “United Airlines” aviaşirkətinin “Boeing” sərnişin təyyarəsi havada olarkən örtük panelinin bir hissəsi qopub.

San-Fransiskodan Oreqona uçan təyyarədəki zədə enişdən sonra aparılan yoxlama zamanı aşkar edilib.

Hadisə zamanı təyyarədə 139 sərnişin və altı heyət üzvü olub.

Xoşbəxtlikdən, hər şey yaxşı bitib, təyyarə uğurlu eniş edə bilib. Aviaşirkət hadisə ilə bağlı araşdırmalara başlayıb.

Bundan əvvəl də San-Fransiskoda eyni aviaşirkətə məxsus “Boeing 777” təyyarəsi havaya qalxarkən təkəri qoparaq düşüb və park edilmiş bir neçə avtomobilə zərər vurub.

Yeri gəlmişkən, qeyd edək ki, “Boeing” istehsalında keyfiyyət standartlarını tənqid edən və məhkəmədə ifşaedici ifadə verən amerikalı mütəxəssis Con Barnettin bir neçə gün öncə meyiti tapılıb.

Mənbə: Lenta.ru