Kökəlməyə səbəb olmayan qidalar əsasən az kalorili, lakin qida dəyəri yüksək olan məhsullardır. Bu qidalar toxluq hissi yaradaraq artıq kalorilərin qəbulunun qarşısını alır və sağlam çəki idarəsini dəstəkləyir. Foodinfo.az xəbər verir ki, bu siyahıda tərəvəzlər ilk sırada gəlir. Xüsusilə ispanaq, brokoli, kələm, xiyar, pomidor və bolqar bibəri kimi tərəvəzlər az kalorili olmaqla yanaşı, lif baxımından zəngindir. Lif həzmi yavaşladaraq uzun müddət toxluq hissi yaradır. Meyvələrdən alma, portağal, qreyfurt, çiyələk kimi şəkər tərkibi nisbətən az olanlar tövsiyə edilir. Bu meyvələr vitamin və antioksidantlarla zəngindir və eyni zamanda arıqlama prosesinə dəstək olur. Zülalla zəngin qidalar da kökəlməyə səbəb olmur. Toyuq filesi, balıq, yumurta və yağsız süd məhsulları həm az kalorili, həm də toxluq hissi təmin edən qidalar arasındadır. Tam taxıllar– bulqur, yulaf, qəhvəyi düyü kimi məhsullar isə yavaş həzm olunan karbohidrat mənbəyi olduğu üçün enerjini uzun müddət təmin edir və acma hissini azaldır. Bundan əlavə, badam, qoz kimi sağlam yağ mənbələri də məhdud miqdarda istehlak edildikdə çəkiyə mənfi təsir göstərmir. Əsas məsələ porsiyaları nəzarətdə saxlamaq və balanslı qidalanmadır.