Türkiyənin Şemdinli bölgəsində hərbiçilərlə PKK terrorçuları arasında atışma olub.

ANS PRESS-in məlumatına görə, əməliyyat həyata keçirən təhlükəsizlik qüvvələri bir qrup PKK terrorçusu ilə üz-üzə gəlib. Atışma nəticəsində 2 əsgər yaralanıb.

Yaralı əsgərlər Şəmdinli Dövlət Xəstəxanasına yerləşdirilib. İlkin tibbi yardım göstərildikdən sonra yaralılar helikopterlə Hakkarı dövlət xəstəxanasına aparılıblar.

Hakkari ərazisində əməliyyatlar davam etdirilir.

Ötən gün isə Dağlıcada partlayış olub. Sentyabrın 6-da axşam İraqla həmsərhəd Hakkari vilayətinin Yüksəkova rayonunun Dağlıca kəndi ərazisində Türkiyə Silahlı Qüvvələrinə məxsus zirehli hərbi texnikanın hərəkəti zamanı yola basdırılmış təxminən 400 kq C-4 tipli partlayıcı maddə terrorçular tərəfindən partladılıb. İlkin məlumatda hadisə nəticəsində 15-dən çox əsgər və zabitin həlak olduğu açıqlanıb. Hadisədən sonra Türkiyə Hərbi Hava Qüvvələrinə məxsus təyyarələr PKK mövqelərini bombalayıb.



Türkiyə Silahlı Qüvvələrinin Baş Qərargahı PKK terrorçularının ötən gecə Hakkari vilayətində törətdiyi terror hadisəsi zamanı şəhid olanların sayını da açıqlayıb. Silahlı Qüvvələrin Baş Qərargahının açıqladığı məlumatda bildirilib ki, hadisə zamanı 16 hərbçi şəhid olub, 6 nəfər isə yaralanıb.

Türkiyə Silahlı Qüvvələrinin bu hadisədən sonra başladığı əməliyyat hələ də davam edir. PKK terrorçlarının 23 hədəfi 3 ədəd F -4, 4 ədəd F 16 tipli döyüş təyyarəlıəri ilə atəş altında saxlanılır.