Alp dağlarında İsveçrəyə məxsus "Ju-52" tipli təyyarə qəzaya uğrayıb.

Publika.az “Röyters” agentliyinə istinadən xəbər verir ki, təyyarənin göyərtəsində olan 17 sərnişin və 3 heyət üzvünun hamısı həlak olub.

Ölənlər arasında 11 kişi və 9 qadın olduğu bildirilib.

İsveçrənin Qrizon kantonunun hüquq-mühafizə orqanlarının məlumatına görə, 1939-cu ildə hazırlanmış və İkinci dünya müharibəsində istifadə olunmuş “JU52 HB-HOT” markalı təyyarədən söhbət gedir. İsveçrə hərbi aviasiyasının dostluğu cəmiyyəti təyyarənin sahibidir. Assosiasiyada “Yunkers” tipli daha iki bərpa olunmuş təyyarə var.

Təyyarə Senyaz piki ətrafında 2540 metr hündürlükdə düşüb. Məlumata görə, təyyarə Tiçino kantonuna ikigünlük ekskursiyadan qayıdırdı.

Qeyd edilir ki, “Junkers”də “qara yeşik” yox idi və bu, hadisənin araşdırılmasında çətinlik yaradacaq.

İsveçrə baş prokurorluğu hadisə ilə əlaqədar cinayət işi qaldırıb.