İsveç millisinin və "Milan"ın futbolçusu Zlatan İbrahimoviç karyerasını uzun müddət davam etdirməyi planlaşdırdığını söyləyib.

Qol.az xəbər verir ki, bu barədə 39 yaşlı hücumçu millinin düşərgəsində keçirilən mətbuat konfransında deyib: "Futbol üçün yaşımı çox gənc görürəm. Daha uzun illər futbol oynamağı planlaşdırıram".

5 illik fasilədən sonra milliyə yenidən çağırılan İbrahimoviç yığmaya geri döndüyü üçün çox xoşbəxt olduğunu vurğulayıb. O, konfrans zamanı göz yaşlarını saxlaya bilməyib.

"İsveçə gəlmək üçün oğullarımla vidalaşdım. Hətta oğlum Vinsent ağladı" - deyə o bildirib.

İbrahimoviç karyerasını "Milan"da davam etdirmək istədiyini də söyləyib: "Milan"ın futbolçularından ayrı qaldığım günlər, iki oğlumla uzaq qaldığım günlər kimidir. Hazırkı klubumda karyeramı davam edib futbolçuların inkişafına kömək etmək istəyirəm".