Futbol üzrə Çempionlar Liqasının qrup mərhələsində V tura start verilib.
"Report" xəbər verir ki, ilk oyun günündə E, F, G və H qruplarında yer alan kollektivlər üz-üzə gəlib.
Türkiyənin "Beşiktaş" klubu qonaq etdiyi "Porto" (Portuqaliya) ilə 1-1 bərabərə qalaraq son matç öncəsi "G" qrupunu lider kimi bitirməyi özünə təmin edib. Beləliklə, "ağ-qaralar" klub tarixində ilk dəfə olaraq Çempionlar Liqasının "play-off" mərhələsinə yüksəlib.
"E" qrupunun görüşünü maraqlı edən "Sevilya" – "Liverpul" qarşılaşması böyük həyəcana səhnə olub. "Liverpul" Firminonun 2 və 30, Manenin isə 22-ci dəqiqədə vurduğu qollarla fasiləyə 3-0 öndə yollanıb. Lakin ev sahibi "Sevilya" Ben Yedderin 51 və 60, Pizarronun isə 90+3-cü dəqiqədə vurduğu qollarla matçı 3-3-lük heç-heçə ilə başa vurmağı bacarıb.
Rəqib qapıçını iki dəfə məyus edən "Liverpul"un braziliyalı futbolçusu Roberto Firmino, Çempionlar Liqasındakı ilk 5 oyununda 5 qol vuran ilk oyunçu kimi tarixə düşüb.
APOEL ilə qarşılaşmadan 6-0 qalib ayrılan "Real Madrid", "Tottenhem"dən sonra "H" qrupundan çıxmağı özünə təmin edən ikinci komanda olub. "Real"ın portuqaliyalı ulduz futbolçusu Kristianu Ronaldu qapıçını 2 dəfə məyus edərək bu mövsüm Çempionlar Liqasındakı qol sayını 8-ə çatdırıb. Beləliklə, o, ötən mövsümdə vurduğu qollarla yanaşı 2017-ci ildə qeydə alınan toplarının sayını 18-ə çatdırmaqla "Çempionlar Liqasında bir təqvim ilində ən çox qol vuran futbolçu" rekordunu yeniləyib. Daha əvvəlki rekord da 2015-ci ildə 16 qola imza atan Ronalduya məxsusdur.
Qrupun digər matçında "Tottenhem" "Borussia Dortmund"u 2-1 məğlub edərək "H" qrupunda liderliyini elan edib.
Qeyd edək ki, bundan əvvəl Fransanın PSJ, Almaniyanın "Bavariya”, eləcə də İngiltərənin "Mançester Siti” və "Tottenhem” kollektivləri 1/8 finala vəsiqəni erkən təmin ediblər.
Çempionlar Liqası, Qrup mərhələsi, V tur
21 noyabr
E Qrupu
21:00. "Spartak" (Moskva, Rusiya) - "Maribor" (Sloveniya) – 1:1
23:45. "Sevilya" (İspaniya) - "Liverpul" (İngiltərə) – 3:3
Xal durumu: "Liverpul" - 9, "Sevilya" - 8, "Spartak" - 6, "Maribor" - 2.
F Qrupu
23:45. "Napoli" (İtaliya) - "Şaxtyor" (Ukrayna) – 3:0
23:45. "Mançester Siti" (İngiltərə) - "Feyenoord" (Hollandiya) – 1:0
Xal durumu: "Mançester Siti" - 15, "Şaxtyor" - 9, "Napoli" - 6, "Feyenoord" - 0.
G Qrupu
23:45. "Monako" (Fransa) - "Leyptsiq" (Almaniya) – 1:4
21:00. "Beşiktaş" (Türkiyə) - "Portu" (Portuqaliya) – 1:1
Xal durumu: "Beşiktaş" - 11, "Portu" - 7, "Leyptsiq" - 7, "Monako" - 2.
H Qrupu
23:45. "Borussiya" (Dortmund, Almaniya) - "Tottenhem" (İngiltərə) – 1:2
23:45. APOEL (Kipr) - "Real Madrid" (İspaniya) – 0:6
Xal durumu: "Tottenhem" – 13, "Real Madrid" – 10, "Borussiya" – 2, APOEL-2.