Azərbaycanın qadınlardan ibarət yığma komandası Yaponiyada keçirilən dünya çempionatında növbəti oyununu keçirib.

Virtualaz.org bildirir ki, IV tur çərçivəsində Trinidad və Tobaqo yığması ilə qarşılaşan millimiz hər 3 setdə rəqibdən üstün olub – 29:27, 25:16, 25-17.

Bu qələbə ilə xalını 4-ə yüksəldən voleybolçularımız qrupda Tailandla 3-4-cü yerləri bölüşür. Yığmamızın yer aldığı C qrupunda ABŞ 9 xalla 1-ci, Rusiya isə 8 xalla ikincidir. İlk 4 yeri tutan komandalar növbəti mərhələyə vəsiqə qazanacaqlar.

Xatırladaq ki, millimiz bundan əvvəl Cənubi Koreyanı 3:1 hesabı ilə məğlub etmiş, ABŞ və Rusiya idmançılarına isə 0:3 hesabı ilə uduzmuşdu.

Onu da qeyd edək ki, sabah millimiz qrupda sonuncu görüşünü Tailand millisinə qarşı keçirəcək. Bakı vaxtı ilə saat 14:20-də başlayacaq görüşdə qələbə qazansaq, yığmamız növbəti mərhələyə adlayacaq.