İsveçin paytaxtı Stokholmda partlayış baş verib. APA-nın DHA-ya istinadən xəbərinə görə, paytaxtdakı çoxmərtəbəli binalardan birinin zirzəmisində güclü partlayışdan sonra yanğın başlayıb. Bina sakinlərindən xəsarət alanlar olub. Digər sakinlər dərhal təxliyə edilib.

Yerli polis partlayış və yanğın nəticəsində binanın zədələndiyini, uçma təhlükəsinin yarandığını açıqlayıb. Hüquq-mühafizə orqanları hadisə ilə bağlı əlavə məlumat verməsə də, artıq iki nəfərin saxlandığı məlum olub.

Musavat.com reportyorunun Stokholmda yaşayan sabiq jurnalist Könül Həsənlidən aldığı məlumata görə, partlayış binanın zirzəmisində baş verib, bir neçə başqa bina da alovlanıb, iki nəfər yaralanıb, ölən yoxdur, 10 nəfər xilas edilib, 5 nəfər xəstəxanaya aparılıb, 23 nəfər ərazidən köçürülüb.. Yanğın 45 dəqiqəyə söndürülüb.

Yerli media iki nəfərin həbs olunduğunu qeyd edir, ancaq həmin şəxslərin hansı millətdən olduğunu, yerli və yaxud gəlmə olduqlarını açıqlamır. Çünki bu, ictimai asayişi poza, ksenofob təmayülləri gücləndirə bilər.

Partlayışın nədən baş verdiyi də açıqlanmır. İstehkamçılar tərəfindən hadisə yerində araşdırma aparıldığı deyilir.