ABŞ-ın Atlanta şəhər hava limanında sərnişin baxışı keçirilən zaman tapançadan atəş açılıb.

Trend-in məlumatına görə, bu barədə ABŞ Nəqliyyat Təhlükəsizliyinin saytında bildirilib.

Məlumata əsasən, hadisə nəticəsində 3 nəfər yaralanıb.

Xidmətin açıqlamasında bildirilib ki, gündüz saatlarında nəqliyyat təhlükəsizliyi əməkdaşları sərnişinin çantasında qadağan olunmuş əşyanın olması səbəbindən onu yoxlayıblar:

"Əməkdaş sərnişinə çantaya toxunmamağı tövsiyə edib və o, çantada silahın olduğu yeri açanda sərnişin qaçaraq baqaja yaxınlaşıb, tapançanı tutub, bundan sonra atəş açılıb. Daha sonra sərnişin hava limanının çıxışından qaçaraq nəzarət zonasını tərk edib".

İlkin məlumatlara görə, 3 nəfər xəsarət alıb, onların həyatı üçün təhlükə yoxdur.