“Yalnız dahi dövlət rəhbəri dünyada mövcud olan maliyyə-iqtisadi böhranı zamanı öz ölkəsinin tikinti sektorunu inkişaf etdirməyə qadirdir. Bu səyləri biz bu gün Azərbaycanda görürük. Prezident İlham Əliyevin tapşırıqlarına əsasən bu gün ölkəmizin bütün bölgələrində oldğu kimi Səbail rayonunda mənzil tikintisi ilə bağlı yerli sahibkarlar tərəfindən yeni layihələrə başlanıb və artıq ilk nəticələr var”.

DİA.AZ xəbər verir ki, bu sözləri Səbail Rayon İcra Hakimiyyətində 2016-cı ilin birinci rübünün sosial-iqtisadi inkişafının yekunları və qarşıda duran vəzfələrə həsr olunmuş yığıncaqdakı çıxışında rayon icra hakimiyyətinin başçısı Eldar Əzizov deyib. O, bildirib ki, artıq bu istiqamətdə xeyli iş görülüb, 9-dan çox layihəyə baxılaraq təsdiq olunub və bu prosses davam edir. Bu işlərin həyata keçirilməsi ilə bir sıra istehsal sahələrinin bu layihələrə cəlb olunması, yeni iş yerlərinin açılması və ən əsası sakinlərimizin işlə təminatı məsələləri öz həllini tapacaq. Bildirilib ki, artıq tikinti sektorundakı işlərə maraq xeyli artıb. Bu da ölkədə gedən islahatlarla birbaşa bağlıdır.

Toplantıda aprel ayının ilk günlərində cəbhənin təmas xəttində ermənilərin silahlı təxribatının qarşısını alarkən qəhrəmancasına şəhid olmuş əsgər və zabitlərimizin əziz xatirəsi bir dəqiqəlik sükutla yad edilib.

İcra başçısı Nazirlər Kabinetinin iclasında prezident İlham Əliyevin proqram xarakterli nitqinin əsas məqamlarına toxunub. Qeyd olunub ki, son günlərdə təmas xəttində fəallaşan erməni təxribatlarına ordumuz tərəfindən layiqli cavab verilib. Əldə olunmuş hərbi-siyasi uğur böyük əks-səda doğurub, əhalinin bütün təbəqələri, xüsusilə də gənclər arasında rəğbətlə qarşılanıb.

İclasda Səfərbərlik və Hərbi Xidmətə Çağırış üzrə Dövlət Xidmətinin Səbail Rayon İdarəsinin rəisi, polkovnik Polad İbrahimov, Səbail Rayon MKTB-nin rəisi Səmədağa Aslanov, Səbail Rayon Gənclər və İdman İdarəsinin rəisi Vüqar Mürsəlov, 7 saylı orta məktəbin direktoru Könül Həsənova, 2 saylı SƏİD-in rəisi Rüfət Əhmədzadə, Səbail Rayon Sukanal İdarəsinin rəisi Rauf Osmanov və başqaları çıxış ediblər.