Çoxdandır ki, mərhum eks-prezident Əbülfəz Elçibəyin qardaşı Almurad Əliyevdən heç bir xəbər yoxdur.

Dia.az xəbər verir ki, bu səbəbdən də Modern.az saytı Almurad Əliyevlə əlaqə saxlayıb.

“Şükür Allaha ki, yaxşıyıq. Özümüzə görə yaxşı dolanırıq. Başımızı aşağı salıb yaşayırıq. Mən də yaşlı adamam. Buna baxmayaraq, ölkədə gedən proseslərdən xəbər tutmağa çalışıram”,-deyə Almurad Əliyev deyib.

Həmçinin, o, aprelin əvvəllərində cəbhədə yaşananlara da münasibət bildirib.

“Aprelin əvvəllərində cəbhədə yaşananlar mənə də təsir etdi. Çoxlu şəhidlər verdik. Amma bir məsələ də var ki, evini, yurdunu, torpağını qoruyan şəhid də olar. Vətənin azadlığı uğrunda şəhidlərimiz də olacaq”.

Almurad Əliyev siyasətdəki dostlarından və qardaşı oğlu Ərturqut Əliyevdən də söz açıb.

“Çoxdandır ki, siyasətçilərlə işim yoxdur. Təbii ki, siyasətdə olan dostlarım var. Tez-tez zəng edib halımı soruşurlar. “Nə lazımdısa kömək etməyə hazırıq” deyirlər. Sağ olsunlar. Hamısından razıyam”

Ərturqut isə neçə müddətdir ki, işləyir. Telefonla danışırıq. Amma öz bildiyini edən uşaqdır. Çalışıram ki, üzərinə çox getməyim”.