İsmayıllıda güllə atıcılığı üzrə rayon birinciliyi
26 iyun-Silahlı Qüvvələr Günü hər bir azərbaycanlının həyatında əlamətdar günlərdən biridir. Ulu öndər Heydər Əliyevin 1998-ci il 22 may tarixli Fərmanı ilə həyata vəsiqə alan bu tarixi gün hər il ölkəmizdə yüksək səviyyədə qeyd olunur.
Rayonumuzda da Silahlı Qüvvələr günü ilə bağlı idman yarışları,müsabiqələr, turlar keçirilir.
İyunun 24-də Rayon Gənclər İdman İdarəsinin və Qarbağ Müharibəsi Əlilləri, Veteranları və Şəhid Ailələri İctimai Birliyi rayon filialının birgə təşkilatçılığı ilə şəhər üç saylı məktəb-liseyin idman bazasında güllə atıcılığı üzrə rayon birinciliyi keçirilib.Yarışda 20 nəfərdən çox gənc idmançı, Qarabağ müharibəsi əlili və veteranı güllə atıcılığı üzrə öz qüvvəsini sınayıb.
Yarışı giriş sözü ilə RGİİ-nin rəisi Taleh Salehov açıb.Sonra RİH-nin İctimai-siyasi və humanitar məsələlər şöbəsi müdirinin müavini Murad Məhərrəmov yarış iştirakçılarını Silahlı Qüvvələr Günü münasibətilə RİH-nin başçısı adından təbrik edib, iştirakçılara uğurlar arzulayıb.
Yarışda Sübhan Mürşüdov birinci, İlham Şərifov ikinci və Azər Şahalıyev isə üçüncü yeri tutub. İdmançılara medallar və RGİİ-nin fəxri fərmanları təqdim olunub.