Bakıda valideyn polisə məktub yazaraq məktəb müəllimini qızını döyməkdə ittiham edib. Bu barədə Sputnik Azərbaycan-a Səbail Rayon Polis İdarəsindən məlumat verilib.

Hüquq-mühafizə orqanları şikayətçi Vəfa Məmmədovanın şikayətini qəbul ediblər. Valideyn iddia edir ki, noyabrın 8-də 49 saylı məktəb-liseyin müəllimi Xumar Məmmədova kitabla onun üçüncü sinifdə oxuyan qızını vurub və nəticədə qız çənə nahiyəsindən xəsarət alıb.

Sözügedən məktəbdən isə bildiriblər ki, direktor Təhminə Əsədova məsələni aydınlaşdırmaq üçün valideyni məktəbə çağırıb, lakin sonuncu gəlməkdən imtina edib.

Eyni zamanda, məlum olub ki, noyabrın 8-də Xumar Məmmmədova sözügedən şagirdi nizam-intizamı pozduğuna, sinif yoldaşlarına qarşı kobud davranışına, məktəb formasına dair tələbləri yerinə yetirmədiyinə görə danlayıb.

Müəllim iddia edir ki, qızın valideyninə öz iradlarını çatdırıb, lakin sonuncu qızına düzgün davranış qaydalarını başa salmaq əvəzinə, pedaqoq haqqında yanlış məlumat yaymağa başlayıb.

Məktəb-liseydə valideynin şikayətini qəti surətdə rədd ediblər. Hazırda araşdırma davam edir.