Vaşinqton yaxınlığında təyyarə və helikopterin toqquşması nəticəsində aralarında konkisürən, məşqçi və Amerika fiqurlu konkisürmə təşkilatlarının üzvləri olmaqla fiqurlu konkisürmə ilə əlaqəli 14 nəfər həlak olub.

Bu barədə “NBC News” telekanalı Boston Fiqurlu Konkisürmə Klubuna istinadən məlumat yayıb.

Bu idman klubunun baş direktoru Duq Zeqib qeyd edib ki, bu, bütün fiqurlu konkisürmə ictimaiyyəti üçün böyük itkidir. Onun sözlərinə görə, ölənlərdən altısı Boston Fiqurlu Konkisürmə Klubunun üzvü olub - iki məşqçi, iki konkisürən və uşaqlarını müşayiət edən iki valideyn.

Qeyd edək ki, göyərtəsində 60 sərnişin və 4 ekipaj üzvü olan “American Airlines” aviaşirkətinin təyyarəsinin göyərtəsində 3 ekipaj üzvü olan “Black Hawk” hərbi helikopteri ilə toqquşması təyyarənin Ronald Reyqan hava limanına enməyə yaxınlaşdığı məqamda baş verib. Təyyarənin qalıqları Potomak çayına düşüb. Qəzadan sağ çıxan olmayıb.