Neftçilərin Hüquqlarını Müdafiə Komitəsinin sədri sosial şəbəkədəki səhifəsində "Azəriqaz" İB-nin mətbuat xidmətinin rəhbərinə "İbrahim Kərbalayev, görürsünüz yalanlarınız bir-bir ortaya necə çıxır?" başlığı altında maraqlı şikayət məktubu ünvanlayıb.

Mia.az komitə sədrinin yaydığı həmin şikayət məktubunu təqdim edir:

""Azəriqaz"ın rəhbəri, cənab Əkbər Hacıyevə!

Ağstafa rayonu Qıraq Kəsəmən kənd sakini, abonent Ələddin Qarayev (Abonentin kodu - 296104200003270) bildirib ki, bu gün (05.01.2018-ci il) bizə yekun borcla bağlı bildiriş verilib. Yazıb ki, "mənim sayğacımda 31.12.2017- ci ilə olan 4661 göstəricini bu gün, yəni 5.01.2018ci il tarixdə sayğacın göstəricisini müəyyən edən aparatı proqramlaşdıraraq 30.12.2017 köhnə tarixi yazaraq, 4744 kub israf kimi bildirişdə təqdim ediblər. 83 kub qaz sərfiyyatımı 10 qəpiklə ödəyəcəyim halda, bu maxinasiya vasitəsi ilə 20 qəpiklə ödətmək istəyirlər"".

Xatırladaq ki, bir neçə gün əvvəl hüquq müdafiəçisi Mirvari Qəhrəmanlı 2018-ci ilin başlamasına baxmayaraq, qaz sayğaclarının hələ də sıfırlanmadığını iddia etmişdi.

O bildirirdi ki, Qaz idarələrində olan itkilər, bu itkilərə görə vəzifəli şəxslərin vəzifədən getmə (cəzalanma) ehitimalı yüksək olduğundan, onlar da qaz itkisini ört-basdır etmək üçün abonentlərin sayğac göstəricilərində dekabrın qaz sərfini yanvar ayınının əvvəllərində qeyd etməyi planlaşdırıblar.

M.Qəhrəmanlı fakt olaraq ailə üzvünün üzləşdiyii halı da qeyd edib. Bildirib ki, qızı smartkarta 10 manat yükləyib, amma sayğaca 10 deyil, 5 manat yüklənib: "Halbuki, yanvarın 1-dən etibarən limit ləğv olunmalı idi. "Azəriqaz”ın rəhbəri Əkbər Hacıyev, bu gün qızım smartkarta 10 manat pul vurub. Ancaq sayğac 5 manat yüklədi. Niyə oğurluq? Pulu həftə sonunadək qaytarmasan, səni məhkəməyə verəcəm. Hanı sənin sıfırlanman?”.



Mirvari QƏHRƏMANLI

Maraqlı məqamlardan biri də bu idi ki, hüquq müdafiəçisinin qaldırdığı faktlara "Azəriqaz” İstehsalat Birliyinin ( İB) İctimaiyyətlə əlaqələr şöbəsinin rəhbəri İbrahim Kərbalayev özünəməxsus formada cavab vermişdi.

O, qeyd edib ki, 2018-ci il yanvarın 1-dən etibarən bütün sayğaclar sıfırlanıb:

"Tarif (qiymət) Şurasının 2016-cı il 22 dekabr tarixli, 19 nömrəli qərarına uyğun olaraq 2017-ci ilin yanvar ayının 1-dən etibarən əhali qrupu üzrə istehlak olunan təbii qazın illik həcminin 1700 kubmetr olan hissəsinin dəyəri 10 qəpiklə, 1700 kubmetrdən artıq istifadə olunan hər kubmetr qazın dəyəri isə 20 qəpiklə hesablanıb. 2017-ci il üçün təyin olunmuş limit dekabr ayının sonunda sıfırlanıb. Mirvari Qəhrəmanlı yeganə abonentdir ki, bu barədə şikayət edir. Ünvanı, sağyacın kodunu qeyd etsin. Biz bazada baxaq. Əminliklə bildirirəm ki, elə bir problem yoxdur. Və yeganə insandır ki, belə bir müraciət ünvanlayıb ki, guya 10 manat yükləsə də, 5 manat yüklənib”.

İ.Kərbalayev sözlərinə belə davam edib:



İbrahim Kərbalayev

"Birincisi, sayğacın göstəricisi manatla deyil, kubla göstərilir. İkincisi, onun məsələsilə bağlı müraciət ünvanlamışıq ki, abonent kodunu bizə bildirsin. Yalnız o halda araşdırma aparıb açıqlama verə bilərik”.

"Azəriqaz” rəsmisi qeyd edib ki, 2017-ci ildə təbii qazın monitorinqi zamanı mexaniki sayğacla təmin olunan abonentlərin 25 faizi illik limiti keçib: "Smart tipli sayğaclarda, həmçinin, "Smart ITRON” məişət qaz sayğaclarından istifadə edən əhali istehlakçıları üzrə 1700 kubmetr limit 2018-ci il yanvarın 1-i tarixindən başlayaraq smart karta aparılan ilk ödəniş əməliyyatından etibarən hesablanacaq. Yəni, əgər abonentin sayğacında ötən ildən məbləğ qalıbsa, 2018-ci ildə hansı aydan ödəniş edəcəksə, o vaxtdan yeni 1700 kubmetr qaz limiti hesablanacaq”.

Göründüyü kimi, Kərbalayevin sözlərindən fərqli olaraq, Ağsatafa sakini sayğac kodunu da qeyd etməklə, hələ bu gün sayğac göstəricisinin sıfırlandığını şikayətində yazıb. Üstəlik, saxtalaşdırılmaqla...

Qeyd edilənlərlə bağlı "Azəriqaz"ın doğru-dürüst açıqlama verəcəyinə ümid edirik.

Mia.az