Azərbaycan Demokrat Partiyasının (ADP) sədri Sərdar Cəlaloğlunun Londonda şirkətlərinin üzə çıxması haqda xəbərlər yayılıb.

Reyting.az-ın xəbərinə görə, araşdırmaçı jurnalist Cavanşir Həsənli bununla bağlı sənədlər paylaşıb.

Cavanşir Həsənli yazıb ki, Sərdar Cəlaloğlunun oğlu Cəlal Məmmədov da Londonda şirkət açıb. Onun bildirdiyinə görə, “SYNERGY COOPERATION LIMITED” şirkəti bu ilin fevral ayının 15-də qeydiyyatdan keçib. Sənədlərdən məlum olub ki, ADP sədrinin oğlu İngiltərə vətəndaşlığı alıb.

Fakta münasibət bildirən ADP sədri Sərdar Cəlaloğlu deyib ki, onun oğlu 2003-cü ildə ölkəni tərk edərək İngiltərəyə gedib: “Mən 2003-cü ildə həbsdə idim. Övladlarımla bağlı təhlükə yaranmışdı. O zaman BMT-nin xətti ilə bir oğlum İngiltərəyə, digəri Norveçə mühacirət edib. Əslində mən həbsdə olduğum üçün bunları detallı bilmirdim. Oğlumun birinə İngiltərə səfirliyi bu təklifi edib. Digər oğlum Sankt-Peterburqda oxuyurdu və elə oradan da Norveçə gedib. BMT xətti ilə ona 5 ölkəni seçmək təklif edilmişdi, o, Norveçi seçib”.

Cəlaloğlu qeyd edib ki, hazırda Londonda yaşayan oğlu orada universitetin beynəlxalq hüquq və beynəlxalq münasibətlər fakültəsini bitirib: “O, məktəbdə yaxşı oxuyurdu, amma səhətində problemlər olduğu üçün biz imkan vermirdik ki, dərslə çox məşğul olsun. Onun Londondakı tələbə yoldaşları arasında kral övladları da olub. Özü öz gücünə təhsil alıb”.

ADP sədri əlavə edib ki, Londondakı övladı hazırda taksi sürücüsüdür:

“Oğlumun müasir dövr üçün çox populyar peşəsi olsa da, taksi sürür. Bunun da səbəbi onun səhhətində olan problemlərlə bağlıdır. Çünki konkret bir şirkətdə çalışsa, orada əmək intizamına əməl etməlidir. Əmək intizamına İngiltərədə çox iddi yanaşılır. Amma taksi sürücüsü kimi özü istədiyi vaxt işləyir, iş prosesi zamanı özünü narahat hiss edəndə evə gəlib istirahət edə bilir”.

O, əlavə edib ki, oğlunun şirkət açmasından xəbərsizdir: “Orada şirkəti 20 dəqiqə ərzində aça bilərsən. Bunu yayanlar araşdırıb görsünlər ki, oğlum vergi verirmi, konkret hansı miqdarda və şirkətinin dövriyyəsi var. O sənədlərdən bixəbərəm. Amma bir daha qeyd edirəm ki, oğlum orada taksi sürücüsü işləyir”.