44 günlük savaşda Azərbaycan ordusunun möhtəşəm qələbəsindən sonra Qarabağdakı separatçı-terrorçu rejim tör-töküntülərinin Rusiya hərbi kontingentinin qucağında oturmuş başçısı Araik Arutyunyan “mən də varam” demək üçün Xocalı rayonunun kəndlərinə növbəti səfər edib.

Moderator.az xəbər verir ki, bu haqda Xankəndindəki separatçı nəşrlər məlumat yayıb.

Separatçı terrorçubaşı Əsgəran yaxınlığında Qarqar çayı üzərində inşa edilən çayın baş qovşağının tikintisi işləri ilə tanış olub. Araik hesab edir ki, ikin sonunda bu qovşaq istifadəyə verildikdən sonra ətrafdakı 2000 hektardan çox ərazini məhsuldar əkin sahəsinə çevirmək mümkün olacaq.

Bundan əlavə, separatçı rəhbər Xocalı rayonunun Ağdam şəhərinə hərbi-strateji baxımdan yaxın yüksəkliklərdə yerləşən “Xanapat” adlandırılmış Xanabad və “Xramort” adlandırılmış Pirlər kəndlərinə də baş çəkib, sakinlərə Pirlər kəndinə gedən yolun bu il asflatlanacağına söz verib.

Zəruri şərh:
Yadınızdadırsa, ötən il bu vaxtlar Araik Sərsəng SES ətrafında 100 milyon dollarlıq kanal çəkilişi layihəsindən dəm vururdu. Lakin ordumuzun 44 günlük müzəffər savaşından sonra həmin layihə alınmadı. İnşallah, xalq və dövlət olaraq bir az da ağıl, təmkin, qeyrət və təpər göstərsək, Araiklərin bütün layihələri gorbagor olacaq...