Vaşinqton çərşənbə günü, Azərbaycanda, tənqidçilərin fikrincə, müstəqil jurnalistikanın məhdudlaşdırılmasına yönəlmiş Media haqqında yeni qanun layihəsinin qəbulundan narahatlığını bildirib.

“Biz narahatıq ki, Azərbaycan parlamenti Media haqqında təklif olunan qanunun ratifikasiya üçün Prezident Administrasiyasına göndərilməsi ilə tələsib”, – deyə Dövlət Departamentinin nümayəndəsi Turan-ın şərh sorğusuna cavab olaraq bildirib.

“Ümid edirik ki, Prezident Administrasiyası qanun layihəsinə baxarkən müstəqil jurnalistlərin, mediaekspertlərin və ATƏT də daxil olmaqla beynəlxalq qrupların təkliflərini diqqətlə nəzərdən keçirəcək”, – deyə mətbuat katibi əlavə edib. “Biz bu məsələni diqqətlə izləməyi davam edəcəyik.”

Kütləvi informasiya vasitələri təşkilatları üçün məlumat bazası yaradan və jurnalistlərin dövlət tərəfindən qeydiyyata alınmasını tələb edən təklif olunan qanun Azərbaycan parlamenti tərəfindən dekabrın 30-da qəbul edilib və hələ prezident tərəfindən imzalanmayıb. Yerli KİV və hüquq müdafiə təşkilatları bildiriblər ki, qanun potensial olaraq Azərbaycanda ifadə azadlığına genişmiqyaslı məhdudiyyətlər qoya bilər.