Amerika Azərbaycanlıları Cəmiyyətinin sədri Tomris Azəri Diasporla İş üzrə Dövlət Komitəsinin keçirdiyi Dünya Azərbaycanlılarının IV Qurultayına çağrılmaması ilə bağlı narazılığını ifadə edib.

Modern.az-ın məlumatına görə, o bildirib ki, ötən illər ərzində keçirilən qurultayların heç bir nəticəsi olmayıb.
“Amerika Azərbaycanlıları Cəmiyyəti dünyada ilk qurulan cəmiyyətdir, 59 il ABŞ,-da Azərbaycan bayrağını uca tutub. Bizi qurultaya çağırmasalar nə olacaq ki.

Eks-prezident Heydər Əliyev ilk Qurultayda məni Dünya Azərbaycanlılarının əlaqələndirmə şurasına vitse-prezident seçmişdi. Prezident İlham Əliyev isə mənə şöhrət ordeni verib.

Diasporla İş üzrə Dövlət Komitəsinin nə etdiyi bəlli deyil”, deyə diaspor rəhbəri vurğulayıb.

İyunun 3-4-də Bakıda Dünya Azərbaycanlılarının IV Qurultayı keçiriləcək. Dünya Azərbaycanlılarının IV Qurultayına hazırlıq məqsədilə Diasporla İş üzrə Dövlət Komitəsinin nəzdində təşkilat komitəsi yaradılıb.

Qurultayda dünyanın 49 ölkəsindən 500-dən çox Azərbaycan diaspor təşkilatlarının nümayəndələri, habelə Azərbaycana dost münasibətilə tanınan xarici ölkələrin nüfuzlu siyasətçiləri, ictimai xadimləri və elm adamlarından ibarət 50 nəfərə yaxın qonağın iştirakı gözlənilir.