“Hazırda Rusiyaya qarşı tam açılım siyasəti yürüdən Nikol Paşinyan Qarabağla bağlı Moskvaya qarşı demarş edir. Artıq bunu sərbəst şəkildə etməkdədir”.

Bu sözləri Globalinfo.az-a politoloq Zaur Məmmədov deyib.

Onun sözlərinə görə, məlum olduğu burada əsas istiqamətlərdən biri Qərbin hərbçilərinin missiya adı altında Zəngəzura gətirilməsi idi:

“Aİ-nin Ermənistandakı missiyası ötən ilin payızında İrəvan-Brussel arasındakı Praqa razılaşmasına görə 3 aylıq Zəngəzurda yerləşdirilmişdilər. Sonra da onların müddətinin uzadılması vaxtı isə əlavə heç bir sənəd imzalanmamışdı. Fevralın 20-dən noyabrın 20-dək hüquqi əsas olmadan bölgədə qalan Aİ missiyasına bugünlərdə leqallıq verildi.

Zaur Məmmədov

Ermənistanla Avropa İttifaqı arasında missiyanın statusu haqqında sazişdə təsbit olunan əsas məsələ odur ki, avropalı missionerlər diplomatik status alırlar. Söhbət səhiyyədən tutmuş texniki məsələlərə qədər müşahidəçilər üçün əlçatan şəraitin yaradılmasından gedir.

Aİ-nin Ermənistandakı diplomatik missiyası faktiki olaraq daha 100 nəfər artacaq. Gələcəkdə isə sayları 500 nəfərə qədər artırıla biliər. Qərbin xüsusi missiyasının nümayəndələrinin diplomatik toxunulmazlığı olacaq. Onların baqajında axtarış aparıla bilməz və beləliklə, yük adı altında silahdan tutmuş, casus texnikasına qədər hər şey Ermənistan ərazisinə gətiriləcək”.