İran prezidenti İbrahim Rəisi cümə günü İranın Kirman şəhərində törədilən terror aktının qisasının alınma vaxtını və yerini İran silahlı qüvvələrinin təyin edəcəyini bildirib.

Bu barədə “Tasnim” agentliyi məlumat yayıb.

Yanvarın 3-də ölkənin cənubundakı Kirman şəhərində törədilən hücumda həlak olan 89 nəfərin dəfn mərasimində çıxış edən İbrahim Rəisi xalqın İran İslam Respublikasının "gücünün ən mühüm komponenti" olduğunu deyib.

Ölkə prezidentinin sözlərinə görə, “düşmənlər artıq İranın gücünün miqyasını görüb və hiss ediblər”.

İranın Kirmandakı dəhşətli terror aktına görə qisas almasına gəlincə, Rəisi əmin edib ki, “İran silahlı qüvvələri təşəbbüsü ələ alacaq və cavab tədbirinin vaxtını və yerini müəyyənləşdirəcək”.

Mənbə: publika.az