İnsan hüquqları müdafiəçisi Novella Cəfəroğlu AXCP sədri Əli Kərimlinin köməkçisi, “Azadlıq” qəzetinin maliyyə direktoru Faiq Əmirlinin həbsi ilə bağlı açıqlama verib. Gununsesi.info-ya açıqlamasında hüquq müdafiəçisi deyib ki, Faiq Əmirlinin barəsindəki ittihamlara inanmır: “Faiqi lap uşaq vaxtından tanıyıram. Çox ləyaqətli uşaqdır. 15 yaşından yanımızda, gözümüzün qabağında böyüyüb. Sözsüz ki, onun haqqında deyilən Fətullah Gülənlə əlaqəsi olmasıyla bağlı iftiralara qətiyyən inanmıram”. N.Cəfəroğlu qeyd edib ki, F. Əmirlinn mövhumatçı olmasına inanmır, çünki bu qətiyyən mümkün deyil. Fikrini əsaslandırmağa çalışan hüquq müdafiəçisi qeyd edib ki, Faiq Əmirli İslam dininə inansa da, mövhumata uymayıb: “O müsəlmandır, amma mövhumatçı deyil. Fətullah Gülənlə bağlı məsələylə əlaqəsi olmasına da inanmıram. Çalışacam da nəyin bahasına olursa olsun, Faiqi oradan çıxardım. Faiq mənim dogma oğlum kimidir. Özü də o alkoqollu içki içən adamdır. Elə bu, əsas verir inanım və deyim ki, Faiqin mollalara, nurçulara dəxlisi yoxdur”-, deyə o bildirib. N. Cəfəroğlu qeyd edib ki, əvvəllər həbs edilənlərin ardınca polis idarələrinə gedib, saxlananlara yerindəcə baş çəkib, kömək etsə də, indi yaşıyla əlaqədar o qədər də aktiv hərəkət edə bilmir: “Əvvəllər polis bömələrinə gedir, saxlananlara baş çəkə bilirdim. İndi o yaşım deyil. Amma buna baxmayaraq, hara lazımdır zəng etmişəm. Sabahdan da onun müdafiəsinə başlayacam. Digər həbs edilənlərin də artıq müdafiəsinə başlamışıq. Amma Faiqin yeri, məhəbbəti ürəyimdə başqadır deyə, çalışacam ki, onun azadlığa çıxmasına tezliklə nail olum. İnanıram ki, bu anlaşılmazlıq tezliklə aradan qaldırılacaq”.