“Meta” Avstraliyadakı “Facebook” və “Instagram” istifadəçilərinin ictimai yazılarından süni intellekt (AI) modellərini öyrətmək üçün istifadə etdiyini etiraf etdi.

İndex.az şirkətin qlobal məxfilik meneceri Melinda Claybaugh bu məlumatı Avstraliya hökumətinin süni intellekt təcrübələri ilə bağlı araşdırması zamanı təsdiqləyib.

“ABC News”a görə, “Meta” Avstraliyadakı istifadəçilərə məlumatlarından necə istifadə edəcəyini seçmək imkanı vermir. Bununla belə, Avropa İttifaqı ölkələrində məxfilik qanunlarına uyğun olaraq, istifadəçilərin süni intellekt təlimi üçün bu cür məlumatların istifadəsindən rədd etmək hüququ var.

Lakin Avstraliyada belə bir hüquqi tənzimləmə olmadığı üçün istifadəçilər öz yazılarının “Meta”nın süni intellekt modelləri tərəfindən istifadə olunmasının qarşısını ala bilməzlər. “Meta” bildirir ki, bu məqsədlə yalnız istifadəçilərin “ictimai” olaraq təyin edilmiş yazıları və şərhləri istifadə olunur.

Daha məhdud məxfilik parametrləri olan yazılar bu prosesdən təsirlənmir. Lakin Avstraliyada məxfilik qanunlarının olmaması səbəbindən “Meta”nın bu təcrübəsi mübahisələrə səbəb olub. Avstraliya hökumətinin bununla bağlı hansı addımları atacağı maraq doğurur.

“Meta”nın bu addımı böyük texnologiya şirkətlərinin istifadəçi məlumatlarını necə toplayıb istifadə etməsi ilə bağlı yeni müzakirələrə səbəb oldu. Nəzərinizə çatdıraq ki, məxfilik mövzusunda həssas olan istifadəçilər tətbiq icazələrini yoxlamalı və bundan sonra daha diqqətli olmalıdırlar.