“Avropada qlobalist təsirə qarşı mübarizə son dərəcə vacibdir”

Macarıstanın Baş naziri Viktor Orban deyib ki, Avropa Komissiyası “Sorosun cibindədir”. AYNA xəbər verir ki, “Kossuth Radio”ya müsahibəsində Orban qeyd edib ki, Avropa Komissiyası Soros şəbəkəsinin yaradılmasını “Avropa İttifaqı ölkələrinin hesabına maliyyələşdirir”.

Baş nazir qeyd edib ki, Avropada qlobalist təsirə qarşı mübarizə son dərəcə vacibdir: “2025-ci il Soros şəbəkəsinin Avropadakı təsirinin aradan qaldırılması üçün həlledici il olacaq. Ümid edirəm ki, digər vətənpərvər Avropa liderləri qitədə suverenliyin bərpasında Macarıstana qoşulacaqlar".

Macarıstanın enerji təhlükəsizliyi məsələsinə toxunan Baş nazir enerji qiymətlərinin yüksəlməsini ölkə iqtisadiyyatı üçün böyük risk adlandırıb. O, Macarıstanın “Türk axını” qaz kəmərini qorumaq öhdəliyini bir daha təkrar edərək, onu “Macarıstan iqtisadiyyatının həyat xətti” adlandırıb.

Orban 2030-cu illərin əvvəllərində Paks II atom elektrik stansiyasının işə salınmasından əvvəl sağlam enerji siyasətinin aparılmasının vacibliyini vurğulayıb.