İsrail bazar günü Qəzza zolağına bütün malların və materialların daxil olmasını dayandırıb və HƏMAS-ın mövcud atəşkəsin uzadılması ilə bağlı yeni təklifi qəbul etmədiyi təqdirdə “əlavə nəticələrlə” üzləşə biləcəyi barədə xəbərdarlıq edib.

HƏMAS İsraili mövcud atəşkəsi pozmaq cəhdində ittiham edib və yardımı kəsmək qərarının “ucuz qəsb, müharibə cinayəti” və bir ildən çox davam edən danışıqlardan sonra yanvar ayında qüvvəyə minən atəşkəsə “açıq hücum” olduğunu bildirib.

Hər iki tərəf atəşkəsin bitdiyini deməkdən yayınıb.

Humanitar yardımın artımını əhatə edən atəşkəsin birinci mərhələsi şənbə günü başa çatıb.

Hər iki tərəf İsrailin geri çəkilməsi və davamlı atəşkəs müqabilində HƏMAS-ın qalan onlarla girovu azad etməli olduğu ikinci mərhələ üzrə hələ danışıqlar aparmayıb.
İsrailin qaydalara uyğun olaraq adının açıqlanmaması şərti ilə danışan rəsmisi yardımın dayandırılması qərarının Tramp administrasiyası ilə koordinasiya əsasında verildiyini bildirib.

ABŞ-dan İsrailin elan etdiyi təklif və ya yardımı kəsmək qərarı ilə bağlı dərhal şərh verilməyib.

Yanvarın 19-da atəşkəs başlayandan bəri hər gün yüzlərlə yardım maşını Qəzzaya daxil olur və yardımların kəsilməsinin dərhal təsirinin nə olacağı hələ məlum deyil.

İsrail ABŞ-ın Yaxın Şərq üzrə nümayəndəsi Stiv Vitkoffdan gəldiyini söylədiyi yeni təklifdə atəşkəsin həftə sonu başlayan müsəlmanların müqəddəs Ramazan ayı və aprelin 20-də sona çatan yəhudi Pasxa bayramına qədər uzadılması çağırışını əhatə etdiyini bildirib.

İsrailin baş naziri Benyamin Netanyahunun ofisindən verilən məlumata görə, bu təklifə əsasən, HƏMAS girovların yarısını birinci gün, qalan hissəsini isə daimi atəşkəs haqqında razılıq əldə edildikdən sonra azad etməlidir.

Atəşkəsin altı həftə sürən birinci mərhələsi çərçivəsində HƏMAS İsrail tərəfindən saxlanılan 2000-ə yaxın fələstinlinin azad edilməsi müqabilində 25 israilli girovu və daha 8 girovun cəsədini azad edib.

İsrail qüvvələri Qəzzanın əksər hissəsindən geri çəkilib və İsrail Gəzzaya humanitar yardımın daxil olmasına icazə verib.