Prezident Donald Tramp cümə axşamı Kyivə faydalı qazıntılar üzrə saziş imzalamaq üçün təzyiq etməyə davam edib və Moskvanın Rusiyanın 2022-ci ildə Ukraynanı işğal etməsi ilə başlayan müharibəyə son qoymaq üçün sazişi bağlamağa hazır olduğuna əminliyini ifadə edib.

Tramp NATO üzvlərinə “ödəməsələr, mən onları müdafiə etməyəcəyəm” mesajı göndərib.

O, qonşu ölkələr arasında sülhə necə vasitəçilik edəcəyi ilə bağlı fikirlərini paylaşıb.

"Düşünürəm ki, baş verəcək şey Ukraynanın razılaşmaq istəməsidir, çünki onların seçimi olduğunu düşünmürəm", Tramp qeyd edib.

O əlavə edib ki, Rusiya prezidenti Vladimir Putinlə Səudiyyə Ərəbistanında “yəqin ki, növbəti ay yarım ərzində” görüşə biləcək.

Günün əvvəlində Trampın Yaxın Şərq üzrə xüsusi elçisi Rusiyanın işğalını dayandırmaq və atəşkəs barədə danışıqlar aparmaq məqsədilə Ukrayna nümayəndələri ilə görüşmək üçün Səudiyyə Ərəbistanına gedəcəyini bildirib.

"Biz indi Ər-Riyadda, və ya Ciddədə ukraynalılarla görüşü koordinasiya etmək üçün müzakirələr aparırıq. İdeya sülh sazişi və ilkin atəşkəsin şərtlərini müəyyənləşdirməkdir", Stiv Vitkof bildirib.

Vitkofun sözlərinə görə, Tramp hesab edir ki, ötən cümə Ağ Evdə iki lider arasında baş verən gərginlikdən sonra Ukrayna prezidenti Volodimir Zelenski yanlışını anlayıb.

"O, Zelenskinin məktubunun [qarşıdurmanın "təəssüf doğuran" adlandırıldığı] çox müsbət ilk addım olduğunu hesab edir. Orada üzrxahlıq var idi. ABŞ-ın Ukrayna üçün çox şey etdiyini etiraf etmək və minnətdarlıq hissi var idi", Vitkof deyib.

Bu arada Zelenski Avropa liderləri ilə təcili danışıqlar aparmaq üçün Brüsseldə olub.

“Biz özümüzü Rusiyadan daha sürətli, daha ağıllı və daha səmərəli silahlandıracağıq”, Aİ-yə sədrlik edən Polşanın baş naziri Donald Tusk deyib.

Avropa Komissiyasının sədri Ursula von der Leyen, 27 üzv ölkəni növbəti dörd il ərzində müdafiəyə təxminən 863 milyard dollar sərmayə qoymağa təşviq etmək öhdəlikləri ilə yanaşı, istəyən ölkələrin müdafiəyə daha çox xərcləməsi üçün büdcə qaydalarını yumşaltmaq planını irəli sürüb.

“Biz çox minnətdarıq ki, tək deyilik və bunlar sadəcə sözlər deyil. Biz bunu hiss edirik. Bu, çox vacibdir", Zelenski bildirib.