ABŞ dövlət katibi Marko Rubio prezident Donald Trampın Rusiya-Ukrayna müharibəsinə tez bir zamanda son qoymağa çalışdığı bir vaxt ABŞ-Ukrayna danışıqları üçün bazar ertəsi Səudiyyə Ərəbistanının Ciddə şəhərinə səfər edəcək.

Dövlət Departamentinin sözçüsü Tammi Bryus bildirib ki, Rubio Ciddədə olduğu zaman Səudiyyə Ərəbistanının vəliəhd şahzadəsi Məhəmməd bin Salman Əl Səud ilə görüşərək, regionda ortaq maraqları inkişaf etdirmək və ABŞ-Səudiyyə münasibətlərini gücləndirmək yollarını müzakirə edəcək.

Dövlət Departamentinin məlumatına görə, Rubio cümə günü Ukraynanın xarici işlər naziri Andriy Sibiha ilə telefon danışığında “Prezident Trampın müharibəni mümkün qədər tez bitirmək əzmini qeyd edb və bütün tərəflərin davamlı sülhü təmin etmək üçün addımlar atmalı olduğunu” vurğulayıb.

Bazar ertəsi Ukrayna prezidenti Volodimir Zelenski Səudiyyə Ərəbistanının vəliəhd şahzadəsi Məhəmməd bin Salman ilə görüşmək üçün Körfəz krallığına səfər edəcək.

Bundan sonra Zelenskinin baş qərargah rəisi Andriy Yermakın başçılıq etdiyi Ukrayna diplomatik və hərbi nümayəndə heyəti ABŞ rəsmiləri ilə danışıqlar aparmaq üçün Səudiyyə Ərəbistanında qalacaq. Ukrayna komandasına Sibiha, müdafiə naziri Rustem Umerov və hərbi komandir Pavlo Palisa da daxildir.

Rubio ilə yanaşı Ukrayna rəsmiləri ilə Ciddədə danışıqlarda ABŞ-ın milli təhlükəsizlik müşaviri Mayk Valz və Trampın xüsusi nümayəndəsi Stiv Vitkoff iştirak edəcək.

Vitkoff jurnalistlərə bildirib ki, “məqsəd sülh sazişi və ilkin atəşkəs üçün çərçivə hazırlamaqdır”.

ABŞ və Ukrayna arasında danışıqlar yüksək səviyyəli ABŞ rəsmilərinin Ər-Riyadda Rusiya rəsmiləri ilə danışıqlarından üç həftə sonra keçirilir.

Ukrayna ABŞ-la konstruktiv dialoqa “tam sadiq olduğunu” və “lazımi qərarlar və addımları müzakirə edib razılığa gəlməyə” ümid etdiyini bildirib.

“Ukrayna bu müharibənin elə ilk saniyəsindən sülhə can atır. Real təkliflər masa üzərindədir. Əsas odur ki, tez və effektiv hərəkət edək”, Zelenski şənbə günü X səhifəsində yazıb.

G7 ölkələrinin xarici işlər nazirlərinin görüşü

Səudiyyə Ərəbistanına səfərindən sonra Rubio martın 12-dən 14-dək Böyük 7-lər (G7) qrupunun xarici işlər nazirlərinin görüşü üçün Kanadanın Şarlevua şəhərinə gedəcək.

Fevralda Münhen Təhlükəsizlik Konfransı çərçivəsində keçirilən danışıqlardan sonra verilən birgə bəyanatda G7 qrupunun xarici işlər nazirləri “davamlı sülhün əldə edilməsinə” kömək etmək öhdəliyini vurğulayıblar və Ukrayna üçün “etibarlı təhlükəsizlik qarantiyalarının hazırlanmasının zəruriliyini bir daha təsdiqləyiblər”.

“Fevraldan sonra hər hansı yeni əlavə sanksiyalar Rusiya Federasiyasının Ukraynaya qarşı müharibəni nəhayət bitirmək üçün real, xoş niyyətli səylər göstərib-göstərməməsi ilə şərtlənməlidir”, birgə bəyanatda deyilir.